Nongpoh, Nailar 27: Ha kawei ka jingjia aksiden kaba la jia haka miet jong ka sngi Balang ha surok bah National Highway-6 ha Ri-Bhoi District, haka shnong Umlyngkdait, uwei u samla rangbah ula mynsaw jur hadien ba u la leit ban tynrah da ka Auto Rickshaw ïa kawei ka Mahindra Pick-Up kaba kit siej bad kane ka jingjia kala jia mar pyrshah bad ka Jiva Restaurant.
Katkum ka jingtip bala ioh lum la ong ba kane ka jingjia kala jia haka por kumba 8:30 eiei mynmiet, ha kaba ka Auto Rickshaw kaba don ïa u Registration Number ML 10 B 6302 bala ñiah da u Bah Donbor Nongrum naka shnong Umskun kala leit ban tynrah nadien ïa kawei ka Pickup kit siej kaba don ïa u registration number AS 25 B 0021.
Ha kane ka jingjia U nongñiah ka Auto Rickshaw u la mynsaw jur bad la pynkit mar mar ïa u sha Civil Hospital Nongpoh ban ioh ka jingsumar bad ka namar ka jingshitom kaba la kham jur la rah noh ïa u Shillong ban ioh ka jingsumar kaba kham paka. Ki Pulit ka Nongpoh Traffic Branch kila poi mar mar sha katei ka jaka ban pynlong ïa ka jingtohkit halor katei ka jingjia.
