Mairang, Nalar 24 : Kumba 80 % na ki nongshong shnong jong ka Eastern West Khasi Hills District ki dei ki ba im da ka rep ka riang bad ki mar rep ba kongsan ki long u kba , riewhadem, sohphlang, sohsaw, biskot ki jhur ki jhep ba bun jait ki soh kum ki soh peace, soh brab bad kiwei kiwei bad ha kine ki snem ba la dep bun na ki nongshong shnong ki la sdang ban pynkhlaiñ ban rep biskot. Haba phai sha ka jingrep biskot ki shnong Madanbynther, Mawsaw, Langstiehrim, Nonrmai, Mawlyntriang ter ter haduh ki thaiñ Nongkhlaw ki dei ki shnong kiba khlaiñ bha ban pynmih biskot.
Ha kine ki sngi la ïoh ban ïakren bad ki katto katne ngut ki nongrep biskot na ki thaiñ Nongkhlaw ha kaba ki la ong ba ha u bnai Naitung ba la dep ki dang ïoh ban pynïaid ïew ha ka dor arphewsan haduh laiphew tyngka shi kilo hynrei ha ka taïew ba nyngkont jong une u bnai Naliar pat ka dor ka la hiar khatsan tyngka bad ha kine ki sngi lei lei ka la hiar sha ka saw tyngka shi kilo. Kitei ki nongrep ki la kren bynñiaw ruh da kaba ong ba lada ka ïew ka hat ka long kumne kam don jingmyntoi shuh ban rep biskot namar ka jingmih bad ka jinglut jingsep ka long kaba bun bha namar ïa ki siej ban shna rynsan hap ban thied ha ka dor kaba rep nangta ka bai kali ban kit bad kiwei kiwei ki jinglut jingsep.
Kitei ki nongrep ki la ong ruh ba lajan baroh ki mar rep kiba ki nonmgrep na kane ka jylla ki pynmih ym don uwei ruh u mar rep uba ka dor ïew dor hat kan neh ne kan kiew kumba kiew ki mar bam mar dioh kiba wanrah na shabar ka jylla. Nalor kata ki la ong ruh ba ha kine ki sngi ka shini ka la kiew dor haduh hynriewphew tyngka shi kilo katba u biskot pat lai haduh saw tyngka shi kilo. Ha kajuh ka por ki la ong ba lada die arphew kilo u biskot ka dang ïa ryngkat bad ka dor jong shi kilo ka shini . Ki la kyntu ruh ïa ka sorkar ba ka dei ban thaw ki lad ki lynti ban pynïoh ïa ka ïew ka hat kaba biang bad la kumno kumno ka dor ka mur kam dei bah hiar palat kumba ka long mynta khnag ba ki nongrep ki lah ban kyntiew ïa ka ïoh ka kot jong ki.
