Naduh ka por jong i Pa, u Dr.Kharlukhi ula treilang ha ka seng bad ha ka sorkar: Conrad

Shillong, Nailar 24 : U National President ka NPP ba dei ruh u Myntri Rangbah ka Jylla u Conrad K Sangma ha ka sngi Nyngkong u la ong ba ka jingresaiñ noh jong u Dr. WR Kharlukhi na ka party ka dei ka rai shimet jong u kumta na ka liang ka party ruh ka burom ïa katei ka rai.
Haba kren sha ki lad pathai khubor, u Conrad Sangma u la ong ruh ba katei ka dei ka rai kaba u shim hi bad kumta na ka liang ka party ki burom.
U la pynkynmaw ruh ba u Dr. WR Kharlukhi u la don ka jingïadei kaba la slem bha kata naduh ka por jong u kpa jong u, u (Late) PA Sangma.
“Ngi la trei lang la slem bha bad ngi la leh bun ki kam kiba bha na bynta ka jylla bad na bynta ka party. Nga kynmaw burom ïa kita ki por. Ka don ka por ba u briew u don ïa ka jingmut jong u hi, bad lehse don ki kam kiba u kwah ban leh. Ngim don jingeh eiei halor kata,” u la ong.
Nangta u la pynkynmaw ruh ba u kpa jong u, u PA. Sangma, u la kwah bha ïa u Dr. Kharlukhi ban long u MP ka Rajya Sabha naduh mynshwa, hynrei ha kato ka por u Dr. Kharlukhi u la kyntait ïa kata ka jingtyrwa. Na kata ka daw, u Thomas Sangma u la leit ban shimti kum u MP ka Rajya Sabha ha kato ka por.
Shuh shuh u la ong ba hadien ba ki la ïohi ïa ka jingaiti lut jong u ha ka kam saiñpyrthei bad uba la ai bun snem ban shakri ïa ka sorkar bad ïa ki paidbah, ki la sngewdei ba un mihkhmat bad pynssngew ïa ki jingeh bad jingdonkam jong ki paidbah ha Parliament. “Kumta ka party ka la jied ïa u kum u MP ka Rajya Sabha,” u la bynrap shuh shuh.
U la ong ruh ba u Kharlukhi u lah ban don ïa ki jingmut bad ki jingthmu shimet jong u na bynta ka lawei.
Haba pynpaw ïa ka jingsngewsih shimet halor kane ka jingjia, u Conrad Sangma u la ong, “Ki briew kin wan bad ki briew kin leit, kam pher. Hynrei shimet, nga sngewsih ba kane ka la jia. Ngam khmih lynti ba kan jia, hynrei nga burom bad nga pdiang ïa ka rai jong u.”
Da kaba ong ba ka party kan bteng ban trei ïa la ka kam, u Conrad u la ong ruh, “Ngin bteng ban ïaid shakhmat bad ka party kan bteng ban trei. Dang don bun ki kam ban trei bad bun ki briew ki la wan ban pynïasoh bad ka party. Kane ka dei ka rukom jong ka saiñpyrthei bad ka politik jong ki party.”