Thung ka tnad pulit Ri Bhoi ïa u Sahep Nodal ban pdiang ïa ki jingeh ki nongñiah kali Tourist

Shillong, Nailar 24 : Ka tnat Pulit jongka jylla ka la thung ïa u Nodal Officer ban pynbeit bad peitngor ïa ka leit ka wan ki kali hapdeng ka Meghalaya bad Assam bad ban pynthikna ïa ka jingïaid laitluid ki kali bad ki briew hapdeng ki arjylla.
Katkum ka hukum ba la pynmih na ka ophis u Additional Director General of Police, Special Branch, Meghalaya, la thung ïa u DySP (Security) Bah B Nongsiej, kum u Nodal Officer.
Un ïatreilang bad baroh ki district ha Meghalaya bad Assam ban pynsuk ïa ka leit ka wan jong ki kali bad ki nongleit nongwan.
Ka hukum ka ong ba ïa ki jingtip ba bniah jong ki kali kiba sahkut ha Assam bad Meghalaya yn sa ïasam bad ka Meghalaya SB Control Room kaba don ha Shillong, ka ban phah ïa ki jingtip sha ki pulit jong ki district kiba dei peit na ka bynta ban ai jingïarap bad ban synran.
La bthah ïa baroh ki Superintendent of Police (SP) ha Meghalaya ba kin ïai ïakynduh bad ki Pulit ka Assam na ka bynta ban pynbiang nong synran ïa ki kali bad ki briew kiba ïaid sha Assam bad ïa ki kali kiba wan na Assam sha Meghalaya.
Ka police headquarter ka la ïasam ruh ïa ki phone number jong ki nodal ophisar bad ki control room jong baroh ar tylli ki Jylla, ba kynthup ïa u SP (Zonal) Assam Rajendra Ojah (9707081768), Dy SP (Security) Meghalaya B Nongsiej (9863060830), SB Control Room, Shillong (9774618462) Control Room, Assam (9181014888) ban pynbeit ryntih ïa ka jingïatreilang.
Katei ka hukum, kaba la pynmih da u Inspector General of Police (SB), Meghalaya, kan treikam noh mardor bad kan treikam haduh ban da pynmih da kawei pat ka hukum.