Sngewnguh u Conrad ïa u CM ka Assam na bynta ka jingtreilang ban wallam kloi ka jingsuk

Shillong, Nailar 23 : U Myntri Rangbah ka jylla Meghalaya, Conrad K. Sangma u la ong ba ka jingïalang hapdeng ki nongmihkhmat na ka Sorkar Assam bad Meghalaya ha ka sngi Saitjain ka long beit da ka thong ban wallam biang noh mardor ïa ka suk ka sain hadien ba ka la mih ka jingjia bym sngewtynnad kiba la jia ha Shillong ha ka 19tarik mynta u bnai.
Ha ka jingthoh lyngba ka rynsan social media, u Myntri Rangbah u la ai khublei ïa u Myntri Rangbah Assam, Himanta Biswa Sarma, halor ka jingïatreilang jong u halor kane ka bynta. U la pynpaw ruh ïa ka jingsngewnguh ïa u Myntri Sorkar ka Assam u Atul Bora, nangta u Symbud Myntri Rangbah ka Meghalaya Bah Sniawbhalang Dhar, ki heh ophisar bad baroh kiba la don bynta lang ha kane ka bynta.
Kane ka jingïalang hapdeng ki artylli ki jylla ka la mih hadien ka jingïakynad kaba la jia ha ka 19 tarik Nailar, ha ka por ba dang ïaid ka rally paidbah jong ka KSU. Ha kane ka jingïakynad, la don ki jingthombor ïa ki kali haduh ba la poi u pud ba la ktah wat ïa ka leit ka wan hapdeng kine ki jylla.
“Ka phang kaba hakhmat eh ka long ban wallam biang ïa ka jingsuk bad ka jingshngain jong ki paidbah nongshong shnong ka jylla. Ha kajuh ka por, ïa kito kiba donkti ha ki kam thombor bad ki kam pynkulmar yn thwet tyngeh bad pyshitom katkum ka aiñ,” la ong u Myntri Rangbah.
U la ong ruh ba baroh ar jylla ki dang bteng ban trei lang da ka jingïakren bad ka jingïatreilang kaba jan ban pynskhem biang ïa ka jing ïadei hapdeng ka Assam bad Meghalaya.