Ba kyrngah ka Sorkar ban shimti pynïaid hi ïa ka 108, bteng ki nongtrei ïa ka jingïakhih

Shillong, Naitung 27 : Ka kynhun ki nongtrei jong ka EMRI 108 hapoh ka lama jong ka Meghalaya EMRI Workers Union (MEMRIWU) ki la rai ban bteng biang ïa ka jingïakhih hadien ba ka sorkar jylla ka la kyrngah ïa ka jingkyrpad jong ki ba ka sorkar kan shimti ban pynïaid hi noh ïa ka EMRI 108 ha ka jylla.
Haba pyntip ïa katei ka rai, u Nongai ktien ka Union, Bah Roipar Kharaswai u la ïathuh ba kum ka kynhun ki la shong pyrkhat mardor hadien ba u Myntri u la dep ban pynpaw markhmat ha ki ba ka sorkar kan ym lah satia ban pynïaid hi ïa ka EMRI 108.
Shwa kane, ka Union ha ka por mynsngi, ka la leit ban kynduh ïa u Myntri ka tnad ka Koit ka Khiah, James K Sangma halor katei ka phang hynrei ha ka jingïakren, u Myntri u la dep ban pynpaw ba ka sorkar jylla kam pat don jingthmu satia ban pynïaid hi ïa ka EMRI 108 kaba ju tip paidbah kum ki ambulance 108 ha ka jylla.
Haba kren bad ki lad pathai khubor, hadien ka jingkynduh ïa u Myntri, ka President jong ka Union, Kong Kong Microlina Syiemlieh ka la ïathuh ba u Myntri u la pyntip ha ki ba ka jingjied ïa ka kompeni ba thymmai ban pynïaid ïa katei ka kam ka dang ïaid shakhmat hadien ba ka sorkar kam shym la treh shuh bad pynjlan ïa ka kontrak bad ka kompeni GVK.
“Ngi la kyntu jur ïa u Myntri ban shimkhia ïa katei ka kam da kaba shimti bad pynïaid hi noh da ka sorkar ïa ka EMRI 108 ha ka jylla hadien ba ka kompeni ba rim kam shym la lah satia ban ai ka jingshakri kaba hun,” ong ka President.
Hynrei, ka la ong pat ba ka jingïakren ha ka jingïalang kam shym la pynhun satia ïa ki namar u Myntri u la pynpaw shai beit ba kin bteng ban ai pynïaid ha ki kompeni ïa ka 108. La katta ruh ka la ong ba u la kular pat ban peit ba ki nongtrei ka tnad kin ym mad shuh ïa ki jingeh.
Shuh shuh ka la ong ruh ba u Myntri u la pynpaw ha ka Union ba tad haduh mynta hi ym pat don satia ki jylla ha ka Ri kiba pynïaid hi ïa ka EMRI bad kumta na ka liang ka sorkar jylla ruh kam don jingthmu satia ban shim ïa ka.