Da ka SIT thaw ka sorkar Meghalaya ban thwet ïa ki runar ba donkti pynkulmar ha Shillong

Shillong, Nailar 22 : Ka Sorkar Meghalaya ka la thaw da ka Special Investigation Team (SIT) ban ithuh bad thwet ïa baroh ki runar kiba donkti pynkulmar ha Shillong khamtam eh ïa kito kiba donkti ha ka jingthombor ïa ki kali na Assam, ong u Symbud Myntri Rangbah ka Jylla, Bah Sniawbhalang Dhar haba kren bad ki lad pathai khubor hadien ka jingïalang kaba long hapdeng ka sorkar Meghalaya bad sorkar Assam ha kane ka sngi Saitjain ha nongbah Guwahati.
“Ka Sorkar Meghalaya ka la thaw ïa ka Special Investigation Team ban lap ïa baroh ki runar kiba donkti ha ka kam thombor ha Shillong khamtam kiot kiba donkti ha ka jingthombor ïa ki kali Assam bad ban pyntikna ba kin ïoh ïa ka jingpynshitom katkum ki kyndon aiñ,” u la ong.
Shuh shuh shwa kane, u Symbud Myntri Rangbah u la ïathuh ba ki la dep ban ithuh ruh kumba san ngut na ki runar kiba donkti ha katei ka jingjia ha ka 19tarik Nailar khamtam eh haba ïadei bad ka jingthombor ïa ki kali Assam.
U Symbud Myntri Rangbah u la pyntip ba haduh mynta ki la don haduh kumba 3,770 tylli ki kali Assam kiba la dep ban synran na Meghalaya ban leit phai biang sha Assam.
Ha kane ka jingïalang, la pyntip ruh ba la buh ïa ki number na ka bynta ban pynsuk ïa kito kiba donkam ïa ki jingïarap. La ïathuh ba ka Assam Control Room ka la ïoh pdiang kumba 54 tylli ki distress call lane ki jingpan jingïarap kaba kynthup ïa ki 175 ngut ki briew ïa kiba la ïoh ban ïarap ban pyllait ïa ki.
Napdeng kine la ong ba ki kynthup ïa ki 22 tylli ki kali shimet bad san tylli ki kali kamai.
Katba ka Sorkar Meghalaya pat kala ïathuh ba ka Control Room jong ki ka la ïoh pdiang haduh 379 tylli ki distress call bad haduh mynta ka la pyrshang lut ki lad ki lynti ban ïarap ïa ki ban wanphai biang da ka jingshngain.
Nangta la ïathuh ba kiba bun na ki nongleit nongwan bad ki kali kiba don kumba 400 – 500 tylli kiba sahkut ha Meghalaya mynta ki la dep ban ïaid lyngba kynthup lyngba ka jingkieng Umïam.
Shuh shuh la pyntip ba kino kino ki nongleit nongwan ne ki kali kiba sahkut ban leit sha Assam yn sa ïarap ïa ki ba kin leit phai da ka jingshngain hapoh ki 49 kynta. La ong ba kan don ka sienjam kaba kyrpang ban pyntikna ba baroh ki nongleit jingleit lane ki kali kiba kwah ban leit phai sha Assam kin poi da ka jingshngaiñ.
Nangta la pyntip ba la mynjur ban don ïa ka jingïatrei lang kaba jan bha hapdeng u IG, Special Branch, Assam bad u IG, Law & Order, Meghalaya, ryngkat ki helpline ba kyrpang ban iarap ïa kiba shah ktah lyngba kine ki number harum – WhatsApp: +91 91810 14 888 bad Landline:0361-2381-511.