Ïasyllok ka MSJA, pulit bad ki samla pule ban don ka jingkitkhlieh haba pyndonkam ïa ka surok

Shillong, Nailar 22: Ka Meghalaya State Judicial Academy, ha ka jingïatreilang bad ku pulit ka jylla Meghalaya, ki la pynlong ïa ka workshop ba shisngi halor ka phang “The Laws Behind Road Safety: Learn the Rules, Respect the Road” hapoh ka Auditorium jong ka High Court ka Meghalaya, Shillong.
Ha kane workshop la lum lang ïa ki samla pule, kiba la pyntbit ïa ka kam pule aiñ bad kumjuh ruh ki ophisar na ka tnat ki pulit pynïaid ka kali ha kaba ka jingthmu ka long ban kyntiew ïa jingsngewthuh halor ka jingkitkhlieh haba pyndonkam ïa ka surok bad ban kohnguh ïa ki kyndon pynïaid kali. Kane ka programme ka pynleit jingmut halor ki kam ka aiñ kaba ïadei bad ki jingpynïaid ïa ki kali bad ki kam jingïada nangta ki jingkitkhlieh jong kiba ñiah kali, kiba shong kali bad kiba pyndonkam ïa ki surok.
Ka Director ka Meghalaya State Judicial Academy, ka Kong Kerpa Meida Lyngdoh Nongbri, ka la pdiang sngewbha ïa kiba la wan bad ka la pynpaw ruh ïa ki mat kiba kongsan ban ai ki jingpynsngewthuh halor ki aiñ ban ïada ha surok hapdeng ki nongshong shnong khamtam ki samla kiba pyndonkam ïa ki surok.
Ha ka jingïalang kaba nyngkong, u Additional SP (Traffic), East Khasi Hills, u Lovish Garg, IPS, ha ryngkat bad u Bah Don Kitbor Koshy Mihsill, MJS, Judicial Magistrate First Class, East Khasi Hills, Shillong bad Sohra Sub-Division, ki la ïasyllok bad kiba shim bynta bad ki la jubab ruh ïa ki jingkylli ba la wanrah da ki samla pule halor ki aiñ bad ki lad jingïada ha surok.
Haba kren halor ka phang u Lovish Garg, IPS, u la ban jur halor ka jingdonkam ban sngewthuh ka jingïadei hapdeng ki hok ki riew shimet bad ka jingïada ha surok. U la ban jur ïa ki jingjied ba shimet ha ki surok ba ym dei ban ïapeiñ ïa ki jingïada halor kiwei pat kiba pyndonkam ïa ki surok.
Ka workshop ka pynleit jingmut halor kiba bun ki kam ba ïadei bad ki jingïada ha surok, kynthup ki jingpynkheiñ ba long manla ka por ki jingpynïaid kali bad ki jingshah pynsajia lyngba ka aiñ, ka jinglong kongsan ban phong helmet bad ka jingdeng ïa ki seat belt, bad ka e-Challan system. Ki jingïasyllok ki banjur ruh halor ki jingïada ki jingtakhuh kali bad ki jingtohkit, ki jingñiah kali kiba don jingïada bad ki bynta jong ka technology ban pynbha ïa ki lad jingïada ha surok.
La ïalam ban pyni ïa kiba shim bynta ïa ki tiar technology ba thymmai ban pynïaid ïa ki kali, kynthup ïa ki Intelligent Traffic Management Systems, CCTV bad Automatic Number Plate Recognition (ANPR) camera, AI-based traffic monitoring, speed enforcement mechanisms bad emergency response systems.
Ha kane ka sngi la ïoh ki jingkren na Deputy SP Ri-Bhoi Varun Dkhar MPS, bad Deputy Inspector General, BSF Shillong Sector, V.S. Rathore, IPS, .
La pynlong ruh ïa ka Road Safety Quiz, nangta halor ki traffic sign, ki road rule, accident scenario bad kiwei kiba ïadei kyrpang ïa ka Meghalaya.
Na ka liang ka Traffic Branch ka la buh ruh ïa ki stall ha kaba kiba ïashim bynta ki la ïoh ïasyllok bad ki ophisar, ïohpdiang ki lad jingtip bad kiwei kiwei ki jingdonkam.
La pynkut ïa ka workshop da kaba shim jingkular halor ki jingïada ha surok kaba la khot da ka Road Safety Ambassador Pledge, bad kiwei kiwei pat ki jingai jingpynsngewthuh halor ki lad jingïada bad kam ñiah kali.