Shillong, Nailar 22 : Ka Shillong Bengalee Students Association (SBSA) ka pynrem jur ia kito kiba donkti ban pynjulor ïa ki mot dur jong u Netaji Subhas Chandra Boase bad Swami Vivekananda bad ka dawa ba dei ban kem bad pynshitom ïa ki kat kum ki kyndon aiñ. Ka pynrem jur ruh ïa kito kiba donkti ban pynjulor ïa ki kali, shoh ïa ki briew ba ïaid ba ïeng.
Ka Seng ka ong ba ka ïeng ha ka nongrim ban ïalong ryngkat ha ka synshar paidbah bad khamtam ban ïa im suk imsaiñ kum ki para nongshong shnong bad kaba kongsan ka long ba kum ki para briew yn ïa im hapdeng ka jingïasngewthuh jingmut bad ia burom mar kylliang.
Ka kyntu ïa ki khun samla bad kyntu ruh ïa ki ban kiar na kito kino ki khubor hamsaia ne kino kino ki jingpynshit ne kwah pynkulmar lyngba ki social media. Ka kyntu ïa ki samla ba kin leh ïa kano kano da kaba bud beit ïa ki kyndonjongka riti synshar jongka ri ban ïaleh ruh da ka lynti kaba jai jai ha kane ka ri synshar paidbah bad kiar na kaba wanrah ïa ka jingsngew ïapher jaidbynriew.
