Pynrem jur ki seng ba Kyntiew Kam Jngohkai ïa ka jingleh thombor ha ka jingïaid rally thuk thuk ka KSU

Shillong, Nailar 22 : Ki Seng kiba Kyntiew ïa ka Kam Jngohkai ha ka jylla kiba kynthup ïa ka our Operators Association of Meghalaya (TOAM), Meghalaya Rural Tourism Forum (MRTF), Tour Guides Association of Meghalaya (TGAM), Federation of Shillong Hotels (FOSH), Meghalaya Tourism Development Forum (MTDF), bad Meghalaya Rural Tourism Cooperative Federation Ltd. (MRTCFL), ha ka jingïalang ba la long ha ka 20 tarik mynta u bnai ki la pynpaw ka jingsngewkhia jur bad pynrem jur ïa ka jingjia kaba la jia ha ka 19 tarik ha ka jingïaid rally thuk thuk ka KS ha kaba bun bah ki kali kiba nabar kiba kit ïa ki nongwan jngohkai, ki briew kiba ïaid ba ïeng, ki bus bad kiwei kiwei ki la shah pynjulor.
Kitei ki Seng ki ong “ Ngi burom ïa ka hok jongno jongno bad ïa ki seng kiba ïakhih da kaba jai jai ha kane ka ri synshar paidbah na ka bynta kino kino ki mat jingdawa hynrei ka dei ban long da kaba ha kaba jai jai bad ha ka lynti ka jingsuk ym dei ban ailad ïa ki runar shim kabu ban ïoh leh ïa kino kino ki jingpynkulmar shnong ban wanrah kata ka jingshongsyier, ban pynjot pynpra ïa ki kali, ne kino kino ki tiar ki tar. Ka jylla Meghalaya ka la trei shitom ban khring ïa ki nongwan jngohkai ba kin sngew shngaiñ ban wan bad ban pdiang sngewbha ruh ïa ki haba ki wan. Hynrei katei ka jingjia ha ka 19 tarik ka la ktah jur pynban ïa ka nam ka burom jongka jylla bad kane kan ktah jur bha ïa ka kam jngohkai ha ki bnai ban wan ruh. Ngi la mad ïa ki jingpynpep noh jong ki nongwan jngohkai ïa ki jaka ba ki la bat ban sah bad ka jingïeng pyrshah na Assam ruh ka la ktah bha ïa kane ka kam jngohkai namar ki briew ki hap ban wan lyngba katei ka jylla haba ki rung sha Meghalaya”
Nalor kane ki la pynpaw ba ka sorkar ruh ka donkam ban da bishar bniah bha ïa ka rukom pynbeit ïa ki bor pahara da kaba bishar kaei kaba la jia ha ka 19 tarik namar ka sorkar ka la shah ba kin ïaid bad ka la dei ban pyrkhing bha ka jingpahara ban peit ba kan ym ktah ïa ka suk ka saiñ.
Kitei ki jingjia ki la dei ban pynïeng shkor ïa ki bor sorkar bad bor synshar district. Ka kam jnoghkai mynta ki por ka bsa bam ïa kumba 30 % ki nong shong shnong ka jylla la ka long beit beit ne lyngba ka kamai ka jih ba ki ïoh haba wan kai ki nongwan jngohkai sha ka jylla khamtam lei lei sha ki thaiñ nongkyndong. Namar naduh ki Homestays, ki nongbtin lynti ïa ki nongwan jngohkai, ki nongñiah kali ki nongdie jingdie ïa ki mar ba shna bad thaiñ hi, ki resturant bad da ki hajar ki longïing ki im ja kpoh na kane ka kam jngohkai.
Kine ki seng ki dawa ba ka sorkar bad ki bor synshar district ki dei ban thwet jur ban ïohkem ïa kito kiba donkti ha ka jingpynkulmar bad pynjulor ïa ki kali ki nongleit nongwan bad ban ai ka jingpynsaja ïa ki kat kum ki kyndon aiñ kiba tyngeh bad ha kajuh ka por pat ruh ban ai jingïada ïa kito kiba ïakhih da ka lynti bajai jai. Kine ki seng ki kyntu ruh ïa ki seng , ki paidbah bad ïa baroh ki nongshong shnong ban kyiar da kino kino ki kam ïaleh pyrshah namar kano kano ka jingbym ïa sngewthuh bad ka sorkar lah ban pynbeit tang da ki jingïakren sngewthuh jingmut.
Ym dei ban ailad ba ka jingjia ba shisngi ne ka jingpynkulmar ba shisngi kan ktah ïa ka nam bad burom jongka jylla kaba la tei da ki snem ba kan long ka jylla kaba shongsuk shongsaiñ bad khring ïa ki nognwan jngohkai. Kine ki seng ki kyntu lang ïa baroh ban ïatrei lang ban ïatei pat ïa kine kiei kiei kiba la dep jia bad kyn tu ruh ïa baroh ban ïakhih da la lynti kaba jai jai kaba tei bad kaba wanrah ka jingmyntoi ïa ki paidbah.