Haduh shilak lah ban ïoh jingïarap pisa ki seng bad ki kynhun ban trei na bynta ki samla

Shillong, Naitung 27: U Myntri Rangbah ka jylla u Conrad K Sangma ha ka sngi u Balang u la pynlait paidbah ïa ka prokram ai jingïarap ha ka jylla sha ki seng Samla shnong, ki seng Treimon Sngewbha, ki Cooperative Society , ki Club kaba la tip kum ka ka Youth Engagement through Empowered Youth Organizations (YESS) khnang ba kin ïoh ïa ka jingïarap pisa kaba lah ban kot haduh shi lak tyngka lada ki seng ki donkam jingïarap haba pynïaid ïa kino kino ki jaid prokram ban ai jingmyntoi ïa ka imlang sahlang khamtam ïa ki khynnah samla.
Haba ai jingkren ha kane ka prokram u Myntri Rangbah u la pynpaw ba ka sorkar jylla ka pynmih ïa shibun tylli ki jait prokram ban kyntiew ïa ka jylla khmtam eh ïa ki samla khnag ba kin lait na ka jingshah ïalam bakla ha ki jingsniew ka juk mynta. U la ong ruh ba ka sorkar ai jingïarap ïa ki khynnah samla kum ka jingkyntu ba kin pyndonkam hok la ki sap ki phong kaba ki don, la ha ka seng kam lajong, ka rwai ka siaw, ka kam lehkai bad kiwei de.
U Myntri Rangbah u la ïathuh ruh ba ka jingpynmih ïa kane ka prokram ka long ruh shi bynta kum ka jingpyntreikam ïa ka State Youth Policy ba la pynmih ha u 2021 kaba batai ïa ka jingthmu jong ka sorkar ban ïasnoh kti lang bad ki samla, ban pynkupbor ïa ki seng samla na ka bynta ban pynkhlaiñ ïa ka roi ka par ki samla da kaba pynshlur ïa ka jingïatrei lang.
Shuh shuh u la ong ba kane ka prokram ka long ruh kum ka jingai mynsiem ïa ki seng bad ki kynhun kiba ka trei shitom na bynta ban kyntiew ïa ka imlang sahlang ha ki kam kiba bun ha ki snem kiba la leit.
U la ong ba ha ka 12 tarik Nailar kaba dei ruh ka sngi rakhe world youth Day yn sa ai nyngkong ïa ki check na bynta ban ai jingïarap sha kito ki seng bad ki kynhun kiba ka ka komiti kan ai jingmynjur ïa ka jingtyrwa kaba ki seng ne ki kynhun kin phah.
U la pynpaw ïa ka jingkhmih lynti ba ki seng samla, ki seng bhalang kin ïashim bynta ha kane ka prokram halor ka jingpynïasoh ban pynkhie im ïa ka jingtrei jong ki seng bhalang. Ïa ka jingtip kaba kham bniah halor kane ka prokram, lah ban leit sha ka website www.yessmeghalaya.in lane lyngba u number phone 9848234106.