Shillong,Nailar 21 : Ka Khasi Jaiñtia Welfare Association (KJWA) ka la pynlong ïa ka prokram plie pyrda ïa ka Jubili Ksiar jong ka ha ka 20 tarik Nailar 2026 ha ka por 11:00 mynstep ha Mission Dorbar Hall, Mission Compound, Shillong.
Kane ka prokram ka long ka jingsdang ïa ka jingrakhe ïa ka jingdap 50 snem ka jingïaid lynti jong ka seng kaba la seng ha ka 20 tarik Nailar 1977. Ïa ka prokram la pynïaid da u Dr. Khlur Mukhim, u Vice President jong ka seng bad u Rev. R. G. Laloo u la long u Kongsan ha ka prokram.
Kum u Kongsan u la ai jingïaroh ïa ka jingshakri jong ka seng bad u la kyntu ban ïai kyntiew ïa ka mynsiem shakri hapdeng ki dkhot jong ka seng bad baroh kiba la ïa sakhi lang ïa ka jingrakhe. U Kongsan u la pyllait paidbah ruh ïa ka kot ba la ai kyrteng Meghalaya GK Reckoner ba la lumthup bad pynmih da ka seng.
Shi bynta jong kane ka jingrakhe ka la long ban pyrto bad kynmaw burom ïa ka jingtrei shitom jong ki nongseng, ki nongkyrshan bad ki dkhot kiba la noh synñiang ha ki snem ba la leit ha ka jingshakri ïa ka jaitbynriew lyngba jong ka seng.
Ha katei ka sngi la pynkup burom kyrpang ïa ki nongseng ba kynthup ïa u – (L) Rev. T. Rodborne, (L) Fr. S. Sngi Lyngdoh, (L) M. R. Allya, (L) Paiem Olim Sing Syiem bad Prof. Helen Giri.
La ïoh ruh ïa lekshor sahpyrto halor kitei ki saw ngut ki nongseng kiba la khlad noh na sla pyrthei ba la kren da i Kong Martha Mary Marwein (Rev. T. Rodborne) Dr. F. Lyngdoh (Fr. S. Sngi Lyngdoh), Bah K. Nongkhlaw (M.R. Allya) bad i Kong Longnam W Kharpuri (Olim Sing Syiem)
Ka KJWA ka khot bad wer ïa ki dkhot, ki nongkyrshan, ki paralok bad ki paidbah ban ïai bteng ka jingkyrshan jong ki ïa ka seng khamtam eh ha kane ka jingrakhe Jubili baroh shisnem.
La pynrhem ïa ka jingrakhe da ka jingrwai kyrpang na u samla Ïaitreilang Warjri. La pynwai ïa ka prokram da ka jingaikhublei na u Dr. A. W. Rani.
Kane ka long katkum ka kyrwoh ba la phah da u General Secretary ka KJWA Shillong, Dr. A.W Rani.
