Kumba 8.30 mynstep la kit ïa ki nongïalam KSU sha ri lum Garo, hapdeng ka jingpahara kaba jur

Shillong, Nailar 21: U President barim jong ka Khasi Student Union (KSU) u Bah Lambokstar Marngar u la pyntikna ba ki pulit kila pynkynriah ïa ki lai ngut ki nongialam ka KSU ba shah kem na Shillong sha ki phatok ha ri-lum Garo ha ka step sngi Thohdieng.
U Bah Lambok u la ïathuh ba ïa kitei ki lain gut ki nongïalam ka KSU la pynkit noh ïa ki ha ka por phra shiteng mynstep ha ryngkat bad ka jingpahara kaba khlain.
Kat kum ka khubor, ïa u President ka KSU u samla Raymond Kharjana yn pynkynriah sha Williamnagar District Jail katba ïa u Vice President u samla Pynkmenlang Sanmiet bad u General Secretary u samla Reuben Najiar yn pynkynriah sha Tura District Jail.
Ïa kine ki lai ngut ki nongialam ka KSU la rah tian bishar hakhmat ka Ïingkashari District & Session Judge ha ka sngi Palei ha Shillong, hadien ka jingshah kem ba ïadei bad ki kam thombor kiba mih ha ka rally thuk thuk ka KSU.Ka Ïingkashari kala hukum ban set 14 sngi ïa ki hapoh ka judicial custody.
Kine ki nongialam ka KSU kila shah kem ha ka sngi Balang hadien ka jingpynkulmar bad jingthombor ha ka rally thuk thuk, kaba lam sha ka jingjulor haduh 31 tylli ki kali, pynmynsaw haduh 16 ngut ki briew, thang ia artylli ki kali nalor ka jingpyn pra ïa u mot u Subhas Chandra Bose bad Swami Vivekananda.
Ki Pulit kila pyntip ba kila ioh pdiang haduh 22 tylli ki ejahar halor kine ki jingjia thombor bad kila pynngat ïa kine ki nongïalam ka KSU ha ki kyndon bapher bapher jong ka Bharatiya Nyaya Sanhita 2023.