Shillong, Naitung 27 : U Bah Titos W Chyne, Chief Executive Member (CEM) ka Khasi Hills Autonomous District Council (KHADC) u la kyntu ïa ka Sorkar Meghalaya Democratic Alliance (MDA) ba kam dei ban kyrkieh ban pynmih ïa ka notification ban pyntreikam ïa ka CPC bad CrPC ha baroh kawei ka Jylla namar kan pynduh bor ïa ki District Council Court, ki Subordinate Court lane ki Vilage Court.
Halor ka jingsaphriang ki jingthoh ha ki rynsan ‘social media’ halor ka phang ban pyntreikam ïa ka CrPC ha kylleng ka Meghalaya ban sloit ïa ka iktiar ki nongbishar District Council Court, u Bah Titos u la ong, “Ka long ka jingshisha ba la mih ha ki ‘social media’ da ki katto katne ki ‘riewpaw-khmat ka Jylla bad u wei na kita u dei u riewsaid aiñ ba paw khmat uba la thoh ha ka Facebook Page jong u ha kaba ïa dei bad ka jingïathuh jong u ba ka don ka jingpyrshang na ka liang ka Sorkar bad ka don ka mukotduma ha High Court ha kaba ïa dei bad ka bor jong ki District Council Court”.
Da kaba pynpaw ba hadien ka jingsaphriang kine ki khubor, u la ong ba kum u Chief Executive Member u la shim khia bad wad jingtip ruh halor kane bad ha ka 27 tarik u Naitung, 2022 ruh ka la don ka jingïalang ka Special Committee jong ki riewtbit ka KHADC ban ïatai bha halor kane ka bynta.
“Nga kwah ban pynshai ba ka don ka mukotduma hapoh High Court ïa kaba ngam lah ban kren eiei halor kane ka bynta namar ka ïa dei bad kawei ka bynta kaba don ka jingbuh dak jingkylli ïa ka bor bad rukom treikam jong ki District Session Court bad ïa ki Court jong ngi”, u la ong.
U la ong ba kawei ka bynta kaba u kwah ban kren ka dei halor ka jingthmu ka Sorkar ba ki mut wanrah ïa ka Notification da kaba ki sot na ka paragraph 5 (1) kaba mut na ka liang ka Sorkar ka mut ban pyntreikam ïa ka CrPC bad CPC ha baroh kawei ka Jylla.
Da kaba pynpaw ba um don jingtip ia ka jingthmu ka Sorkar ha kano ka bynta ban pynmih ïa ka Notification, u la ong, ” Ngi kyntu ïa ka Sorkar ba ka dei ban pynsuki ïa kane bad dei ban shim ia ka jingmynjur jingai jingmut jong ngi ki District Council halor kane ka bynta”.
U la ong ba ka Sorkar kam dei ban kyrkieh ban pynmih ïa ka Notification tad haduh ban da don ka jingïakren ïamir jingmut namar ba ka lah ban don shisha ka jingpynduh bor ïa ki District Council Court, ki Subordinate Court lane ki Village Court. “Kine ki dei ki rukom treikam katkum ka riti dustur jong ngi kiba la ïoh lyngba ka Khyrnit ba Hynriew ka Riti Synshar ka Ri India kiba ngi pynneh pynsah ïa ka rukom synshar jong ngi”, u la ong.
U la ong ba ha kine ki Court ym pat pynrung satia ïa ka CrPC bad lada ïa mynta yn pyntreikam ha baroh kawei ka Jylla kan don ka jingktah. “Ka jingktah kan ym dei tang ïa ki Court hynrei ïa u paidbah bad lada ngat ha ka kyndon CrPC ka long kaba eh bha”, u la ong da kaba kyntu ïa ka Sorkar ba kan khot ïakren shwa halor kane namar kan ktah bad sloit ïa ka bor ki District Council.
Halor ka jingkylli la ka Council kan leit ïakren bad ka Sorkar halor kane, u Bah Titos u la ong ba yn khot ruh ïa ki MDC baroh ban ïakren bad dang shiphang u la ïoh khubor ba ka Sorkar kan khot ïakren lehse mynta ka taïew. “Shwa ka jingkhot ka Sorkar ngin ïakren hapdeng ki MDC bad yn shim ïa ka rai ban ai sha ka Sorkar”, u la ong da kaba pynpaw ba ma u hi shimet un ym ailad ba kano kano ka Notification na ka Sorkar kan pyntlot ïa ka bor ki District Council.
