Halor ka phang pdeng ka bording la pynlong ïa ka District Level Science Seminar 2026 ha JEC Khliehriat

Khliehriat Nailar 21: Ka ophis jong u District School Education Officer, East Jaiñtia Hills District, hynnin ka sngi ka la pynlong ïa ka District Level Science Seminar 2026 ha Jaiñtia Eastern College Khliehriat bad ka phang pdeng jong kane ka prokram ka dei “Indian Energy Basket 2047: Prospects& Challenges” Kane ka phangpdeng ka kdew ïa ka jingbuh thong ha kaba pynmih bording tat haduh u snem 2047.
Ha kane ka prokram u Director jong ka Jaiñtia Eastern College (JEC), Dr. P. Nongtdu u la kren halor ka phang pdeng da kaba pashat jingmut halor ka jingdonkam ka bor ding ban pyntyllum ïa ka khaïï ka pateng, ban pyntikna ïa ka jingshngaiñ ka ribaroh kawei bad ha kaba kyntiew ïa ka ri, u la ong ruh ba ka jingiaid lynti ka India ha kaba ïadei bad ka Viksit Bharat 2047 ka donkam eh ïa ka jingsngew shngaiñ bad ka bor ding, u la batai ba ka thymmei bor ding kaba na u dewïong, na ka umphniang petrol bad na ka ler natural gas ki dei ki thymmei pynmih bor ding ha ri India ba kynthup ruh ia ki bor ding solar, nuclear energy, green hydrogen, electric mobility bad ka energy storage
U Dr P. Nongtdu u kyntu ïa ki samla pule ba ki dei ban sngewthuh kumno ban tyngkai ïa ka bor ding, ban ïada ka ïa mariang, ban ban wad bad tip ïa ka jingstad jong ka scientific bad ong ba da kaba lum lang ïa ki jingtip bad ki jingleh kiba dei jong kane ka juk jong ki khun samla yn lah ban leh eiei ne ban instrument ïa kata ka jingiohi jngai jong ka Viksit Bharat 2047 bad ka Atmanirbhar Bharat.
Ha kane ka prokram la pynlong ruh ïa ka Seminar ha kaba la pynshai bad batai ïa ki khynnah pule lyngba ki slide presentation ha kaba ïadei bad ka phang jong ka bor ding ha ri India lane ka India’s Energy Sector,lyngba ka presentation la batai ruh ïa ka jingdonkam ban pynkhlaiñ ïa ka bor ding ha ka ri ban long ka ri kaba la biang na lade ha ka bor ding,na ka liang ki samla pule ruh ki la ioh ka lad ban iakren ne iatai ha kaba ïadei bad ki lad ki lynti, kumjuh ruh ki jingeh kiba ïadei bad ka bor ding bad ruh halor ki thymmei pynmih bor ding, ka jingkiew ha ka technology bad ka jingdon ki mar lane ki resources.
Ka jingbatai ha ka presentation ka thew ïa ka jingiohi jngai halor ka jingdap jingbiang ka bor ding hapoh ka ri bad tat haduh u snem 2047 ka ri India kan dei kata kaba la bit la biang pura ha kajingpynmih bor ding da kaba lum lang ïa ki tymmei, da kaba don ka jingkitkhlieh ha kaba pyndonkam bor ding ban pynlong ïa ka ri India kaba long energy-independent India, kaba mut ka ri kaba dap ba biang ha ka bording.
Ha kane ka seminar la sam ruh ïa ki prize sha kito kiba jop ha ka seminar bad la sam ïa ki syrnot sha baroh kiba la wan iashimbynta ha kane ka seminar. Ïa ki prize ba kyrpang kum ki nongjop la ai ïa ka Suhana Paul kaba na Ambrose Secondary School,kaba la ioh ha ka kyrdan ba nyngkong, u Daithrang I Dhar uba pule ha Little Star Secondary School, Ladrymbai, uba ioh ha ka kyrdan ba ar bad ka Sakanipaia Siangshai ba pule ha Khliehriat Higher Secondary School, kaba long ba lai, kine ki samla pule kiba jop ha kane ka District Level Science Seminar kin leit ban iashimbynta sa ha ka State Level Science Seminar kaba yn sa pynlong shen.
Kiba la ïa don ryngkat ha kane ka sngi ki kynthup ruh u Block Mission Coordinator (BMS), Saipung Block, East Jaiñtia Hills District, u bah Jimi War,u Assistant Executive Engineer, Sutnga Distribution Sub-Division (MePDCL), u bah Heimonjur Manner, u Assistant Professor, Jaiñtia Eastern College (JEC), Khliehriat, u Prof. Nishwa Rymbai, ki nonghikai lem bad ki khynnah pule.