Shillong, Nailar 21: Ki runar ki bym tip kidei kiei ha ka step 21 tarik kila kawang petrol bomb ïa ka ophis barim ka National People’s Party (NPP) ba don ha Lachumiere, Shillong.
Kane ka jingjia kala jia ha ka por 5 baje mynstep, ong ki Pulit kiba ïathuh ba une u bomb u khlem bthei satia bad ym shym la don kano kano ka jingshah pynjulor.
Ka kynhun Pulit bad ka Forensic kila poi ha kane ka Ophis bad lum ïa ki sakhi star.Ki Pulit kila register case halor kane ka jingjia bad ka jingtohkit mynta kala ïaid shakhmat.
Ha kawei pat ka jingjia, Kawei ka thuk thuk kaba ïeng harud surok ha Malki ka la shah thang ha ki nongleh kam sniew ha ka step jong ka sngi Thohdieng.
Ki pulit ki la iathuh ba ki la register case bad ka jingtohkit ka dang ïaid shakhmat ban kem ïa kiba donkti ha katei kam thang thuk rhuk.
Kane ka jingjia ka la jia shi sngi hadien ba ki runar ki la kawang petrol bomb ha Nongmensong Out Post ha ka miet sngi Plaei ha kaba la pynjulor ïa kawei ka shuki bad ka kynroh jong ka out post.
