Hukum ka ïingbishar ban kem ïa baroh ki briew ba donkti ha ka jingthombor ha ka jingïaid rally ka KSU

Shillong, Nailar 20 : Ka Iing Bishar High Court jongka jylla ka la hukum ïa ki bor synshar ba kin shim ïa ki sienjam kiba bniah bad ba mardor ban kem ïa kito kiba donkti ha ki kam thombor ha ka rally thuk thuk ka Khasi Students’ Union (KSU) ha ka 19 tarik Nailar ha Shillong.
Ka ïing Bishar ka la pynmih ïa kane ka hukum haba shong bishar ïa ka mukotduma suo motu halor ki kam thombor kiba mih na ka rally ka KSU, kaba wanrah ïa ka jingjulor jong ki kali ka Sorkar, Pulit bad kali kamai paidbah bad buh jingma ïa ki nongshong shnong kynthup ki khynnah skul.
Haba shong bishar ïa ka PIL, ka Division Bench u Justice HS Thangkhiew bad Justice W Diengdoh, ka la niew ïa kine ki jingjia kum ki jingjia ba sngewkhia.
U Advocate General ula pyntip ïa ki sienjam bala shim da ki bor khmih bad ïathuh ba katto katne na ki nongkitkam jong ka Sengbhalang ki la shah kem.
Ka ïing Bishar ka la bthah ïa ka Sorkar ban aiti ïa ka kaiphod halor ki sienjam ba la shim ha ka 24 tarik Nailar, ha ka sngi ba la buh ban bishar biang ia kane ka mukotduma.