Shillong, Nailar 20 : Namar ki jingshah thombor ki kali Sorkar ha ka jingïakhih jong ka KSU, ka Meghalaya Government Drivers’ Welfare Association (MGDWA) ka la kyntu ïa ka Sorkar Jylla ban kiar shuwa ha ka ban phah ïa ki kali sorkar sha ki jaka kiba don jingma.
Ha ka dorkhas bala phah sha u Chief Secretary haka sngi Palei, u President ka Association Bah C Syiemlieh ula pynpaw ba bun ki kali Sorkar ki la shah pynjulor bad don ruh kiba la shah thang ha ki kynta ba long ka rally ka KSU ha ka sngi Balang bad katto katne ngut ki nongñiah kali ki la mynsaw malu mala katba ki dang don ha ka kam.
Haba pynpaw ïa ka jingsngewkhia halor ka jing bym shngaiñ jongki nongñiah kali kiba ñiah ïa ki kali Sorkar wat ha ka por ba jur ka jingma, ka Association kala kyrpad ïa ka Sorkar ba kan pynmih jingbthah sha baroh ki Tnad bad Directorate ba kin kiar shuwa ba kin leit jingleit da ki kali Sorkar sha ki jaka kiba don jingma.
Ka Association kala ai jingmut ba kat kaba lah ban leh, dei ban shah ïa ki nongñiah kali Sorkar ba kin pyndonkam da ki kali shimet jong ki Ophisar haba ki leit ha ka kam ïa mynta shipor tad haduh ban da la jai jai ka jinglong jingman.
“Ia ki kam ba kyrkieh lehse, lah ban pynïaid ha ryngkat ka jingai pahara kaba biang” ong ka Association ha ka shithi.
Kala kdew ruh ba wat hapdeng ka jinghap treikam ha ki khep kiba jynjar, ki nongñiah kali Sorkar kim shym la ïoh satia ïa ka Risk Allowance bad kyrpad ïa ka Sorkar ban pyrkhat lem ïa kane ka jingdawa kaba la sahteng la slem bha.
