Dheng kali ha surok ba tur kynsan ki khun ki hajar ka hima Langrin

Shillong, Nailar 19: Da ki spah spah mgut ki khun ki hajar ka Hima Langrin kila iatur paidbah kynsan biang sha Khasi Hills Autonomous District Council (KHADC) ha ka sngi Ba-ar, bad dawa ban weng mardor ïa u Syiem ba mynta u Nangtei Syiemiong bad dawa ruh ban pynlong ka election jied syiem ba thymmai.
Ki khun ki hajar kila rah ruh ïa ki banner bad pyrta slogan kum ka ” KHADC sngap ïa ngi”, “Pynlong ïa ka Election” bad “Weng noh ïa u Syiem” ha shilynter ka surok haduh ban da poi ha khyrdop ka KHADC.
Hynrei, ki bor pyniaid ka KHADC bad ki bor district kim shym la ailad ïa ki ban rung sha phyllaw ka KHADC halor ka nongrim ba kila wan tur khlem da ïoh ïa ka jingbit.
Namar kane, ki khun ki hajar ka Hima Langrin kila pyrshang ban khang ïa ka surok mar khmat ka Ophis ka KHADC, bad kila shong beit ha surok bad kane kala wanrah ïa ka jingdheng kali kaba jur bha ha ka ne ka thain.
Namar ka jingdheng kali kaba khlem khih shuh, kala pynlong ïa ki pulit ban kren shapoh KHADC ban phah plie ïa ka khyrdop khnang ban ïoh rung ki paidbah ha phalor ban lait ka jingdheng kali bad ha kaba khatduh ka KHADC ka hap ban pyndem bad plie noh ïa ka khyrdop.
Ha shwa ban plie ïa ka khyrdop, ki pulit kila pynkhlain bha ïa ka jingpahara ha phalor ka KHADC bad la phah ban rung ïa 10 sngut ki rangbah nongialam ba kin rung shapoh ban ïa kynduh bad u Bah Powel Sohkhlet uba dei u Executive Member namar ka jingbym don u CEM bad u Executive Member ka Elaka.
Haba kren bad ki lad pathai khubor u Bah Watlad Kyrpang Langrin u la ong ba ha ka dorbar ba la pynlong ha Phlangdiloin u Syiem Nangtei u la pynkhein ïa ka riti dustur bad ka rukom pyniaid trei kam jong ka Hima namar ba u la shu khot ïa u riew paidbah ban pynlong chairman ha ka dorbar.
Shuh shuh u la ong ba ka Council ka bthah ïa ki ban leit sha dorbar ban ia pynbeit bad na ka liang ki khun ki hajar ki sngap ïa kata ban ngi leit pan jingshai ha ka dorbar bad ynda la leit u Syiem u la ong pynban ba kidei ki liang pyrshah bad katkum ka Act ym don liang pyrshah ha ka Hima.
U Bah Langrin u la iathuh ruh ba u “Syiem u la ujor da ka ejahar pyrshah ïa 20 ngut ki khun ki hajar jong ka Hima kaba ym pat ju jia koit hapoh ka Hima……Phi lah ban pyntieng pynsmiej ïa mhi hynrei ngin ym kynran dien da lei lei ruh bad ngin ïai ïaleh tad haduh ban da ïoh ka jubab”
Shuh shuh u la ong ba ki khun ki hajar jong ka Hima Langrin kim pdiang ïa u Nangtei Syiem kum u Syiem bad kane ka dei ka kyrwoh khubor ba shai sha ka Council bad sha u Nangtei.
“Ngi la buh ha ka council ba dei ban pyndep mardor ia kane ka jingujor ban bishar bad ban weng noh kum u syiem jong ka Hima bad lada ka council kam lah bad ngi la buh por shi bnai hynrei na ka liang jong ka Council kala ong ba un sa tian bishar kham kloi ia kane kam bad yn sap hah ia ka khubor sha ki khun ki hajar jong ka hima langrin bad ia mynta ngin ïai ap ïa kata ka khubor” u la ong.
Na ka liang u Bah Powel Sohkhlet u la iathuh ba ki khun ki hajar ka hima Langrin ki don kumba 8 tylli mat bad na ai ka seng samla ki don 14 tylli bad ki mat ba ai na ka hima langrin ki mat kidei kiba dang thymmai bad kiba bun hi kidei ki jingujor ha kaba iadei bad kato ka dorbarkaba la khot da u Nangtei ha ka 7 tarik u bnai Nailar.
Ïa kane ka kam jong ka Hima Langrin la shimti da u CEM naduh bas dang bad kum u wei na ki dkhot jong ka EC nga la shim ia kaneka kam bad khot ia kren ia kito ki kynhun bad ha ka jingiakren kila pynpaw halor ka jinglong jong kato ka dorbar bad ki kwah ba ka council kan leh eiei bad khamtam eh ïa u Syiem Nangtei
Ïa kaei ba ngi la ïoh pdiang ïa ki dorkhar ngin sa aiti sha u CEM bad na ka liang jong u CEM un sa shong ban bishar ïa ka jingujor bad khamtam ïa ki mat kiba thymmai bad ngi kwah ba lano ngin pyndep ïa ka jingujor, ong u Bah Powel.