Ym dei ka (Load-shedding) hynrei dei ka jingmaramot ha kito ki jaka: Myntri Bording

Shillong, Nailar 19 : U Myntri ka tnat Bording, Bah Metbah Lyngdoh ha ka sngi Balang u la ong ba haduh mynta kam pat don satia kano kano ka jingthmu ban pynlip bording ha ka jylla.
Haba kren halor ka jingduh bording ha ki katto katne ki jaka, u Myntri u la ong ba kine ki jingjia lip bording ki dei namar ba don ka jingmaramot bad ka jingpynbha ïa ki lain bording ha kito ki jaka.
“Don ki khep ba la hap ban pynsangeh shipor ïa ka jingpynpoi bording namar ka jingkhyllem ki dieng ha ka lain bording lane na ka jingduh ki transformer,” u la ong.
Shuh shuh u la pynshai ba kine ki jingjia kiba rit ki dei shi bynta jong ka jingmaramot bad kam dei satia ba ka don ka jingpynlip bording.
“Haduh mynta hi kam pat don satia ka jingthmu ban pynlip bording,” u la ong da kaba pynshai biang ba ka jinglong jingman ha ka rukom sam bording ha jylla mynta ka la kham paka.
U Bah Metbah u la ong ruh ba ka tnat na ka por sha ka por ki ju lum ïa ki jingïalang bad jingïakren ban peit bad bishar ïa ki kam ba ïadei bad bording ha ka jylla ha ki snem ban wan, khnang ban shim ïa ki sienjam kiba donkam.