Shillong, Nailar 19: Ka seng samla jong ka Hima Langrin kala pynrem jur ïa ka jingleh u Syiem Nangtei Syiemiong ba u la pyndonkam da ki bor pahara shimet jong u ha ka por ba pynlong ïa ka dorbar ha Phlangdiloin, South West Khasi Hills District.
Ïa kane na ka liang jong ka seng samla kila pynpaw ha ka sngi ba leit tur sha KHADC ban pyntip halor ka jingleh bad ki kam jong u Syiem Nangtei ha ka por ba pynlong ïa ka dorbar.
Kum kane ka jingleh jong u Syiem Nangtei kam pat ju jia mynno mynno ruh hapoh jong ka Hima bad nalor ki bor pahara ba u khot shimet u la wanrah lang ïa ki pulit na Mawkyrwat bad buh ruh da ki volunteer kynthei ban phah talasi ïa kiba wan dorbar.
U Bah B Langrin uba dei u President ba thymmai ka seng Samla u la ong “Kaba lyngngoh ka long ka jingpynbeit une u Syiem Nangtei ka long ba kita ki bor pahara jong u lah long kham palat ïa u President ka America namar ba baroh shi katta ki syiem kim pat ju buh bor pahara haduh katto katto.
Shuh shuh u la ong ba balei u Syiem u tieng ïa ki khun ki hajar haba ki kwah haba kwah ban ïa shai ïa shit ha kaba iadei bad ki mat jura kiba ngi dawa na ka por sha ka por.
Na ka liang jong ka kong P Mawlieh kaba dei ka General Secretary ka seng samla Hima Langrin kala ong kumba la pynthymmai ïa ka seng samla kumba la raid a ka General Council ban jied noh ïa ki nongkit kam.
Hapoh ka jingialam u President barim jong ka seng samla ka kong Mawlieh kala kynnoh ba u la ialam bakla bad iaid lait ha kiba bun ki liang ia ka riti synshar jong ka seng, ngi kum ka General Council baroh na ki unit bapher bapher ngi la buh jingmut ban pynlong noh da ka GC.
“Ha u snem 2023 u PS Lyngdoh u ong, Kum ka seng samla ngin ym iaid doubles standart te mynta ka jingkylli ka long ba shaei u don…..hato u don bad ngi mynta, u ong ba un ieng ha kata ka nongrim ba lada long ha kano kano ka rukom ngan ym kynram dien ïa ka jingdon ka double authority hapoh ka Hima……ka jingkylli ka long shaei u jah” buh jingkylli ka kong Mawlieh.
