Na ki 100 ngut kiba la rung kyrteng hapoh ePOS ïoh tang 40 kwintal, sah umdum kiba sam bajah u khaw rashon

Shillong, Nailar 18: Ki nongsam khaw rashon ka Jylla hapoh ka shatri jong ka seng Meghalaya Fair Price Shop Dealer’s Association ki la pynpaw ïa ka jingsah umdum halor ka jingshah sospon jong ki katto katne ki nongsam khaw tang na ka daw ba kiba ïoh jingmyntoi kim shym la pyndep ïa ka eKYC bad kumjuh ruh halor ka jingïoh duna u khaw wat la ki la phah ia ki kyrteng jong kiba ïoh jingmyntoi lyngba ka mashin ePOS (Electronic Point of Sale machine).
Haba kren sha ki lad pathai khubor ka Kong Saralinda Kharlukhi Secretary Meghalaya Fair Price Dealer’s Association bad u Bah Idikshon Kharmulieh u nongsam khaw rashon na Ribhoi bad kiwei pat kiba na ki district bapher bapher ki la sngewlyngoh halor kane ka jingjia.
Ka Secretary ka Association ka la ïathuh ruh halor ka jingïoh subsidy kaba ïapher na kawei ka district sha kawei pat. Ka la ong ba katkum ka jingphone jong kiba sam khaw ki la ïathuh ba ka subsidy kam long ia ryngkat hynrei ka kubur pat ba ki don pat kiba ïoh katkum ba la phah da ka sorkar Pdeng lyngba ka Tnat Supply jong ka Sorkar Jylla.
Watla ka la ong ba ka Sorkar Pdeng ka la leh bha haba ïadei bad ka jingsam khaw bad ai ruh da u khawlai uba dei u Grade A hynrei ki nongsam khaw kiba dang mad ïa kiba bun ki jingeh.
Haba ïadei bad ka jingïoh ia u khaw, ka Secretary ka la ïathuh ba ki don ki nongsam khaw rashon haba ki thep ïa ki kyrteng hapoh ki ePos kumba 100 ngut, hynrei da poi u khaw ïoh tang 40 kwintal kaba mut tang 80 byrni, kumta ka la lyngngoh ba shano pat u khaw uba sah u jah.
Haba ïathuh ba baroh kiba sam khaw ha ka Jylla ki la don malu mala kumba 5000 ngut, ka Secretary ka Association ka la kyntu ruh ïa kiba sam khaw ba dei ban kylli bniah bha ïa ki Subsidy naba ka sorkar ka ai 180 tyngka shi kwintal.
Katba na ka liang u Bah Idikshon Kharmulieh u la ïathuh ïa ki jingjia sha ka thaiñ Ribhoi district ha kaba u la shah sospon tang na ka daw ba kiba ïoh myntoi kim pyndep ne kim kwah leh eKYC bad mad jingeh ka jingshah pynduh khaw.
U la pynpaw ruh ba watla ka ophis Deputy Commissioner Ribhoi Supply ka pynduh khaw ïa ki bym leh eKYC u la sngew lyngngoh pat ba ki kyrteng hapoh ki ePOS mashin ki neh beit kumjuh, da kaba ai nuksa ruh ïa ki jingjia ha la ka jong ka ïing ka sem.
Kumta kine ki Nongïalam ka Association ki la kyrpad ïa baroh ki nongsam khaw ha jylla ban wan sha ka jingïalang kaba dei ka sien nyngkong ha ka 12 tarik u Nailur 2026, ha ka por 11 baje mynstep ha State convention centre Shillong ban pynpaw ïa ki jingeh ha kaba ki nongïalam jong ka All India Federation of Fair Price Dealer’s kin don ban batai bad ban sngap ïa ki jingeh jong ki.
Shuh shuh ki la pynpaw ruh ïa ka jingsngew bynniaw halor ka jingshah ñion ha ka sorkar na ka por sha ka por ha kaba kam shym la don ka jingpynshah shkor ia ka jingdonkam jong ki kaba na ka por sha ka por.
U Bah Kharmulieh haba pynpaw halor ka jingbym lah ban thikna halor ka jingpynpoi ïa ki khaw bad kumjuh ka jingshah pynduh kiwei pat kiba khlem leh ne bym kwah leh eKYC u la ong ba hapoh ka ïing jong u, ki don kumba 5 ngut ki dkhot bad arngut kidei kiba la khlad noh hynrei kitei ki arngut ki la shah pynduh noh u khaw, katba ka kyrteng jong ki par hapoh ka ePOS ka dang paw beit.
Kane ka jingjah jong u khaw uba la pynpaw ïa ka jingdon kiba ïoh myntoi hapoh ka ePOS ka la wanrah ïa ka jingsah ha ka umdum bad kaba ym lah shuh ban tip shano u jah u khaw uba khlem pynpoi sha ki dukan rashon.