Shillong, Nailar 18: Ka Sorkar Meghalaya ka la pynbna ban ai ïa ka Ex-gratia Assistance kaba mar 2 lak tyngka sha kiba haïing ba hasem jong ki 5 ngut kiba na ka Jylla Meghalaya kiba la khlad noh ha ka jingpluh ding kaba shyrkhei ha ka Hotel Bideshini Yatri Nibas ha Tarapith, Birbhum district, jongka West Bengal haka step pyrngap ha ka Sngi U Blei.
U Myntri Rangbah ka Jylla u Conrad K. Sangma ha ka Lah Sngi U Blei ula pynpaw ïa ka jingsngewlem bad ka jingkyndit halor ka jingjia kaba sngewsih kaba la shim ïa ka jingim jong ki 5 ngut ki nongshong shnong ka Dalu, West Garo Hills, kiba leit ïaid Pilkrim sha West Bengal.
Kine ki khlad noh ki kynthup ïa u Rajendra Nath, Asha Nath, Buran Madak, u Shivraj Madak 10 snem ka rta bad Aushnath Madak 8 snem ka rta.
Related Posts
Haba phah ïa ka jingsngewlem sha ki ba haïing ba hasem kiba la duh noh ïa la ki baieid bathoiñ, u Myntri Rangbah ula ong, ba ka jingduh noh ïa ka jingim jong ki 5 ngut ki nongshong shnong ka Meghalaya, kynthup ïa ki arngut ki khynnah ha ka jingjia kaba ym lah ban mutdur.
Ka Ophis jong u Additional Resident Commissioner ka Meghalaya House, ka la ïatreilang bad ki bor pynïaid District jongka Birbhum ban wad ïa ki jingtip kiba pura bad ban ai ka jingkyrshan bad ka jingïarap katba lah sha ki longïing kiba la shah ktah.
Ki bor khmih ka jylla kin shim khia ruh ban pynpoi ïa ka met jong kine kiba la khlad noh sha ka jaka sah ka jongki.
Ki la don ruh sa 6 ngut ki briew kiba na West Garo Hills kiba sah ha katei ka Hotel hynrei la ïoh ban pyllait bad kila lait im na katei ka jingjia.