Shillong, Nailar 18: Ka Nazareth Hospital, Shillong ka la shim bynta ha ka ‘Mission 1500 – Restoring Hope, Empowering Futures’ ban ai ki lad jingïarap da ki jingsumar sha ki jaka kiba la shah ktah ha ka jingshlei um ha Sivasagar, Assam.
Ka Nazareth Hospital ka la ïasoh bad ka AARO Assam’s Mission 1500 ha Sivasagar ban ai ki lad jingsumar sha ki kynhun bad ki lanot kiba la shah ktah kane ka jingwan lynshop jong ka mariang.
Hapoh ka jingïalam jong u Dr. Debomallya Bhuyan, President, AARO Assam, ha kane ka kam la wanlang ki doktor, kiba trei monsngewbha bad ki seng ban ai ki lad jingsumar bad ki jingïarap ha kiba bun ki jaka jong kane ka thaiñ.
Kum shi bynta na kane ka kam, kumba 1,500 ngut ki khynnah skul primary ki la ïoh ki jingkyrshan da ki pla skul, ki kot bad ki notebook bad ki tiar pule puthi ban ïarap ba kin sdang biang ïa ki jingpule jong ki.
“Kane ka long palat ban ïa ka health camp-ka dei ruh ka jingpynpaw ïa ka jingaiti bad kut jingmut ban ieid, ban pynkoit bad ban shakri, ban ïeng lang bad ki kynhun ha kum kine ki por ba ki donkam,” ong ka kyrwoh khubor na ka Nazareth Hospital.
