Sdang ka jingïakhih ki sengbhalang ha Khliehriat da kaba shong kyllaiñ myngor bad thang tyngshop

Khliehriat nailar 17: Ki kynhun sengbhalang ba kynthup ka Jaiñtia National Council, ka Jaiñtia Students Union, Khasi Students Union, ka Hima Sutnga Youth Federation bad ka Federation of Khasi Jaiñtia and Garo People mynta ka sngi ki la sdang biang ïa ka jingiakhih hajan u mot uKiang Nangbah ha Khliehriat, East Jaiñtia Hills District da kaba shong kyllaiñ myngor bad da kaba thang ïa ki tyngshop jong ki nongmihkhmat bad kane ka jingiakhih kadei shi bynta ban dawa na ka sorkar jylla ban pyndam noh shisyndon ïaka public hearing jong ka Shree cement bad ban pynioh shwa ïaka hok ki trai jaka jong ka Elaka Sutnga bad ki nongshong shnong ka elaka Nongkhlieh bad ïa ki Nongrep kiba dei trai ha u Lum Syrman.
Ka seng ka la thang ïa ki tyngshop jong u myntri rangbah ka jylla, u Conrad Sangma, ki ar ngut ki symbud myntri rangbah ka jylla, ka dur tyngshop jong u Sñiawbhalang Dhar bad u Prestone Tyngsong, la thang ruh ïa ki tyngshop jong ki ar ngut ki nongmihkhmat kiba na East Jaiñtia Hills, ka dur tyngshop jong u MLA, Kyrmen Shylla bad ka MLA Sutnga Saipung ka kong Santa Mary Shylla.
Ki sengbhalang ki la sei ruh da ki placard kiba don ki jingthoh ne ki slogan bapher bapher kiba ong down down MDA-2, Shree cement go back- go back.
Haba kren sha ki pathai khubor, u General Secretary ka Jaiñtia National Council (JNC), Central Executive Committee, bah Wanshwa Suting, u la pynpaw ka jingsngewkhia kaba jur halor halor ka jingtih ïa ka surok PWD da ki nongkyrshan ba kyrshan ïa ka public hearing ka Shree Cement, ka jingpynjot ïa ki kali paidbah bad ka jinglehbor bad jingpyndonkam bakla ki pulit ïa ka bor pyrshah ïa ki dkhot bad ïa ki paidbah ba pyrshah ïa ka public hearing. Ka JNC ka la kynthoh ruh ïa ka jingsngap jar bad jinglehbym iohi eiei ruh em da ka Sorkar pyrshah ïa kine ki jingjia bad ong ruh ba imat ka Sorkar Jylla ka kyrshan pura ïa ka kompeni Shree Cement bad kam kheiñ eiei halor ka jingmyntoi, ka jingshngaiñ bad ka hok jong ki paidbah.
U bah Wanshwa Suting u la ong bad pynpaw shuh shuh da kaba ong ba uwei pa uwei u briew uba shah ktah u don ka hok ban leit sha ka jingpynsngew paidbah bad ban pynpaw laitluid ïa ki jingsngew, ki jingeh ba ki don ban pynpaw namar ïa kane ka hok la ithuh ruh da ka Meghalaya State Pollution Control Board. “Ka Sorkar kam dei ban pyndonkam da ka bor ne ki kyndon synshar pyrshah ïa la ki jong ki briew khlem da sngap shwa ïa ka sur jong ki, dei ban ailad ïa ki paidbah ka Sutnga bad ki paidbah na Nongkhlieh ba kin ïashim bynta laitluid ha ki kam kiba ktah beit beit ïa ka khyndew ka shyiap, ktah ia ka mariang, ka kamai kajih bad ka lawei jong ki.” La bynrap utei u nongialam ka JNC.
Na ka liang ka seng JNC ka la pynpaw ruh ïa ka jingdonkam kyrkieh ba ka sorkar kan pynbeit noh ïa ki jingeh kiba ïadei bad ka khyndew ka shyiap kaba ïadei bad ka Elaka Sutnga bad Elaka Nongkhlieh shwa ban ïaid shakhmat ïa kino kino ki kam kiba ïadei bad kane ka projek jong ka Shree Cement. Ka seng ka la pynpaw ba kala dep ban thoh sha ka sorkar ban ïa pynbeit kloi ïa kane ka kam bad ka la ai por ruh 10 sngi na ka bynta ka jubab bad ban leh ïa kaba donkam, hynrei ka jingbym lah jong ka Sorkar ban weng ïa ki jingeh hapoh ka por ba la buh, na kata ka daw ka JNC ka la maham bad kan pynbor ïa ka seng bad ki kynhun sengbhalang ban shim shuh shuh ïa ki synjam jingïakhih paidbah ha kylleng ka East Jaiñtia Hills District.