Tuid da ki hajar ki paidbah sha ka jingrakhe ïa ka sngi laitluid ba 80 ka ri India ha Pahamsyiem

Nongpoh, Nailar 16: Da ki hajar ngut ki paidbah na kylleng ka Ri-Bhoi ki la tuid sha ka madan NSCA, Pahamsyiem mynta ka sngi ban sakhi ïa ka jingïarakhe ïa ka sngi laitluid ba 80 jong ka Ri India, hapdeng ka jingkmen bad ka mynsiem ïeid ri.
U Myntri ka tnad PHE bad Soil & Water Conservation, u Marcuise Marak, u la long kum u kongsan ban kyntiew ïa ka lama lai rong jong ka Ri India, bad ruh ban shim ïa ka salute haka jingïaid march pass bala shim bynta da kumba 25 tylli ki kynhun, kiba kynthup ïa ki pulit jong ka Ri-Bhoi, ki khynnah skul na ki skul bapher bapher, NCC, Bharat Scouts & Guides bad kiwei kiwei.
Ha kane ka sngi la donlang ruh u MLA ka Nongpoh, Bah Mayralborn Syiem, ka Kong Rona Khymdeit, u Deputy Commissioner ka Ri-Bhoi District, Dr. Abhishek Saini, u Superintendent of Police, Giri Prasad, bad kiwei pat ki heh ophisar ka district.
Nalor ka parade, la pynbyrngia ruh ïa ki paidbah da ki jingïashim bynta jong ki khynnah skul kiba la rwai ïa ki jingrwai ieid ri bad ki jingshad bapher bapher bad pynpaw bad pynrhem ïaka mynsiem ieid ri.
La sam ruh ïaki khusnam sha ki kynhun kiba jop haka march-pass bad ka rwai ka shad bad kumjuh ruh sha ki shnong bad ki tnad treikam sorkar kiba la shakri bha ban kyntiew ïaka district haki liang baroh.
Haba ïadei bad ka jingrakhe ha Patharkhmah Civil Sub Division u Bah Gavin Miguel Mylliem MLA ka Sohra u la shim bynta kum u kongsan ban kyntiew ïaka lama lai rong bad ruh ban shim ïaka Salute ha kaba ki don kumba 12 kynhun kiba la shim bynta haka march pass bad la pynphuh pynphieng ruh ha katei ka sngi da ki jingrwai bad jingshad ieid ri bala shim bynta da ki khynnah skul bapher bapher ka thaiñ Patharkhmah.