Kular u CM ban ïai leit buddien ïa ka ktien Khasi bad Garo bad buhthong ban pyndep ka jingpynbeit pud

Shillong, Nailar 16 : U Myntri Rangbah ka jylla u Conrad K Sangmau la kular ba ka sorkar kan ïai bteng ban leit bud dien ïa ka ktien Khasi bad Garo na ka sorkar pdeng ban ïoh pynrung iaki ha ka Khyrnit kaba Phra jongka riti synshar jongka ri India bad kumjuh ruh u la buh thong ruh ban pyndep ïa ka jingia pynbeit pud bad ka Assam.
ïa kane u la pynpaw haba kren ha ka jingkren kum u kongsan ba pynher ia ka Lama jongka ri ha ka jingrakhe ïa ka Sngi Laitluid kaba 80 ha madan Polo ha ka 15 tarik mynta u bnai. Haba kren u la ong “ Ka jingim bad jingskhem tynrai jongka Deiriti ka shong ha ki Ktien lajong. Hooid ngi la shim ïa ka sien jam ban pynsah kynmaw ha ka histori jongka jylla da kaba rai ban pynlong ïa ka Ktien Khasi bad Garo kum ki ktien sorkar lem bad ka English hynrei ngin ïai bud dien bad ka sorkar pdeng ban pynrung sa ha ka Khyrnit kaba Phra jongka Riti Synshar jongka ri”.
U la buh thong ruh ban bud dien bad pyndep ïa ka jingïakren pynbeit pud bad ka Assam. U la ong “ Ka sorkar ka la ïaid shakhmat ym shuh ban pynneh beit ïa ka status quo bad ka kam ka la ïaid bad shiteng la dep pynbeit ïa u pud u sam. Kumta da kane ka juh ka thong yn ïai bteng ban pyndep ïa kiba dang sah. Ki sorkar kiba la leit noh ki ïai ïakren bad pynneh beit ïa ka status quo ne jingburom mar kylliang hynrei kane ka sorkar ka la leh da ki kam namar dei ha ka u Lber 2022 la dep iasoi ia ka MoU bad ka Assam bad la lah ban pynbeit shwa 6 tylli ki jaka ba ïa kajia na ki 12 tylli. La thaw da ki committee ban pynneh pynsah ïa ka shongsuk shongsaiñ ha khappud bad mynta kam don shuh ka jingïapher jingmut bad ngin ïai trei tad haduh ban da pyndep lut ka jingpynbeit ïa kitei ki 6 tylli ki jaka ba dang sahteng”
U la ong lyngba ka OTT platform jongka Hello Meghalaya mynta la lah ban ïohi ïa ki sap ki phong jong palat 450 ngut ki samla Khasi, Garo bad Pnar kum kita ki aktor bad aktress.
U la ñiew tang ruh ïa kiwei kiwei ki kam ba la leh da ka sorkar kata kynthup ia ka jingsiew tulop thymmai ia 23000 ngut ki nonghikai naduh u Iaiong 2026, ka jingbym donkam pynlip bording mynta la lai snem kynthih bad lada phai sha ka ïoh ka kot bad ka khaii pateng ruh ka jylla ka la kiew bha bad la niew ïa ka kum kata ka jylla kaba 3 kaba kiew sted bha ha India.
Haba pynkut u la ong “ Nga kwah ïa phi ba phin leit phai sha ïing ryngkat kane ka khubor, Phai sha ka jingkyrmen ba phyrnai, long kiba ïai shah bad buh thong ban poi shakhlieh tam eh”.