Angnud ki nongshong shnong ban ïohi ïa ka ri India kaba ïada ïa ka jinglaitluid ki niam, ban pynneh ka riti synshar

Shillong, Nailar 16: Watba ka Ri India ka la rakhe ïa ka jingdap kaba 80 snem jong ka jingïoh laitluid jong ka na ki jingshah synshar donbor jong ki dohlieh, hynrei mynta kam shym lait pat na ki jingshah ban beiñ jong ki rit paid, ki kynhun niam rit paid, watla ka riti synshar jong ka ri ka ai ïa ka hok jong ka jingmane laitluid hapoh ka ri.
Kumta halor kane, ha kane ka sngi saitjaiñ na ka liang ki nongshong shnong ka nongbah Shillong, kiba bun ki la ïasnohkti lang ha ka jingïasoi paidbah ha Khyndailad na ka bynta ban pynpaw sha ka ri halor ka jingdonkam ban pynneh ïa ka hok jong ka jingmane laitluid ne ka Protect The Religius Freedom.
Ha kane ka jingïasoi paidbah kaba jar jar la ïohi ka jingïashim bynta jong kiba bun ki nongshong shnong naduh ka por 11 baje mynstep haduh ka por janmiet, bad ïa kane ka jingïasoi paidbah la pynbeit da uwei na ki nongshong shnong uba na Nongbah Shillong uba don ka jingsngewkhia halor kane ka mat jong ka jingshah ban beiñ jong ki kynhun niam barit paid hapoh ka ri.
Ha ka jingthoh banner kaba la wah ha khmat ka khyrdop jong ka Meghalaya Legislative Assembly la pynpaw ïa ka jingdonkam ban ïada ïa ka jinglaitluid jong ki niam khamtam na ka bynta ki khristan hapoh ka ri India.
Kane ka jingïasoi paidbah ka dei ka National Signature Campaign na ka bynta ka jinglaitluid ki niam, ka jingdon kyrdan ka longbriew manbriew, ka suk saiñ bad ka jingïada ïa ka riti synshar jong ka ri, nangta ka jingïada ïa ka jingngeit jong manla uwei pa uwei u nongshong shnong.
Lah ban ong ruh ba kane ka jingïasoi paidbah ha kane ka sngi rakhe ïa ka jinglaitluid ka ri ka lah ban poi shaduh ki tyndong shkor jong u Myntri Rangbahduh ka ri u Narendra Modi bad kumjuh ruh sha u Myntri ka Tnat ki Kam Pohïing ka Sorkar Pdeng u Amit Shah ban pyni ïa ka jingïalong kawei bad long ryntihlang ki nongshong shnong ka jylla Meghalaya, khamtam kiba sah ha Nongbah Shillong kiba la shim bynta ha ka jingïasoi, kiba angnud ïa ka jingsuk bad ka jingpynneh ïa ki hok ki ri synshar hapoh ka ri bad kumjuh ruh ban ïada ïa ka jinglaitluid jong ka jingmane blei bad ka jingngeit jong baroh ki nongshong shnong hapoh ka ri India baroh kawei.
Ha kane ka sngi haba kren bad ki katto katne ki nongshong shnong kiba kynthup na kiba bun ki kynhun jaitbynriew ki la pynpaw ïa ka jingangnud ban don ka jingsuk, ka hok ban mane laitluid bad ka jingïada ïa ki niam rit paid hapoh ka ri bad kumjuh ruh ban lait na ki shah ban beiñ ha kiwei pat ki kynhun heh paidbah tang na kadaw jong ka jingngeit ne ka niam.