Nongstoiñ, Nailar 16: Ka Hynñiewtrep Youths Council Maweit Circle ka la dawa na u Executive Engineer ka tnad PWD (Road) ba u dei ban leh ei ei mardor da kaba maramot halor ka jingjot jingpra jong ki bynta ka surok Nongstoiñ Maweit kaba tang 23 kilometer.
U nongïalam ka seng kata u bah Shemphang Tyrsa President HYC Maweit, u la pynpaw ba ka seng ka la ïoh ïa ki jingujor kiba bun na ki paidbah halor ka jingnang sniew jong kane ka surok, kaba watla ka jingshna ïa ka kam pat da slem hynrei bun ki jaka ki la jot la pra noh.
“Ka seng ka kyrpad ïa ka Ophis ban shimkhia noh mardor ban maramot, namar ka surok kan sa jot shuh shuh bad kan ktah jur ïa ki nongleit nongwan.Kane ka surok ka long ka jingim jong ki paidbah ka thaiñ Maweit Area”, u la ong.
“Ka Seng ka la kyrpad ïa ka Sorkar bad ïa ka PWD ban shimkhia na ka bynta ka bha ka miat jong ka paidbah, khnang ba kane ka surok kan ym jot bun shuh shuh. Ka Seng ka la ïakren ruh na bynta ka jingkieng Risiang kaba la jot bad kaba la pei thliew kumta kane ka la buh jingeh ïa ki paidbah ka thaiñ lada dkut kane ka jingkieng”.
Na ka liang ka u Executive Engineer Bah Ranee u la ïathuh na ym lah shuh ban maramot ïa kane ka jingkieng, namar ka la jot palat. Watla katta kin ïai ïakren sha ki bor ba halor namar la I donkam eh ban ïoh thymmai noh.Ha kaba ïadei bad ka surok na ka liang u Executive Engineer u la kular ban shimkhia ban leh kaba donkam.
Ha ka jingleit ïakynduh jong ka HYC Maweit ïa u EE la donlang ruh nalor u President bah Shemphang Tyrsa, u bah Maximilando Umiong General Secretary, bah Lumlang Kharsyiemlieh President HYC West Khasi Hills District bad kiwei.
