La shem snem ai ba u Myntri Rangbah un wan ban mad ïa u soh ha ka shnong Mynriang: Shangpliang

Shillong, Nailar 16: Ka shnong Mynriang kaba hap hapoh ka jingpeit jingkhmih jong ka Mawryngkneng C&RD Block, East Khasi Hills District ha ka sien ba nyngkongeh kum shi bynta ban rakhe ïa ka jingioh laitluid ka ri India kala pynlong ïa ka Water Melon Festival bad kane ka tamasa kala long shisha kaba jop ha kaba 4 ton tam u soh kila lah ban pyniaid iew.
Ïa kane ka tamasa na ka liang jong ka Dorbar Shnong Mynriang kala ïa trei lang bad ka National People Party Farmers Front bad ïa kane ka tamasa la pynlong beit hapoh ka shnong da ka jingthmu ban kyntiew ïa ka shnong ka thaw.
Ha katei ka sngi kiba bun na ki shnong ba marjan kila tuid sha katei ka tamasa bad kumjuh ruh wat ki briew na kiwei de ki jaka ba la kham pajih kila poi ban leit mad ïa u soh water melon uba la pynmih hi na katei ka shnong lyngba ka jingrep jong ki nong shong shnong.
Ïa kane ka tamasa la sdang ha ka por 10 baje mynstep bad mar sien sdang kane ka tamasa kala sdang ban shong shit bha namar ka jingwan jong ki briew bad ki nongkhaïi ban thied ïa u soh uba kit hung hi bad ba khlem pyndonkam ïa ki dawai dashin.
Nalor u soh water melon ki paidbah kila wanrah ruh ïa ki soh bad ki jhur bat hung hi kum u Sohtrun, ki pathaw, ki syiar bad kiwei de ki jait jhur bapher bapher.
Ka shnong kum shi bynta ban lah ban pyniaid iew ïa une u soh kila khot lang ruh ïa ka seng ki nongkhaïi jhur ki ban iarap bad plie lad lem ia ki paidbah nongrep soh jong ka shnong ba kin lah ban pyniaid ew ia u soh uba kit hung hi.
Na ka liang jong ki paidbah nongrep da ka dur ba phuh sam rkhie katba dang lut ki soh na ki dukan ba ki mar mar kila phah leit kheit biang n alum ban wanrah sha kane ka tamasa namar ka jingtuid jong ki paidbah ban thied ia une u soh ka jur bha, bad lada khein kyllum lang baroh u soh water melon ba la die ha katei ka sngi ka 15 tarik u Nailar kam duna shuh ia ka saw ton tam.
Ki kali ba wan kit ia une u soh ki kynthupp naduh ki pickup, ki auto trok bad kiwei kiwei de kiba kit beit hi smam smam bad ka dor ba ki nongrep ki die ka dei T. 35 shi kilo bad ha kane ka sngi la sakhi ruh ïa ki nongwan jngohkai pyrthei kiba la wan poi ha kane ka shnong Mynriang.
Na ka liang u Bah Bristar Mawthoh bad u Bah Dundee Cliff Khongsit kiba wan ban mih khmat na ka seng ki nong khaïi jhur kila pynpaw ba ki kloi ban ïarap ia la ki jong ki paradoh ki para snam na ka bynta ban pyniaid iew ia u soh jong ki.
Shuh shuh kila kyrpad ïa ki paidbah ba kin thung da ka jingkhein, ioh long kumba jia ia ka dor u kubi namar ba la bun than eh kiba pynmih kumba la jia mynta u snem ha ka ba la hap ban shu sam ei sha ki briew namar ka jingbym iaid dor.
Na ka liang u Chairman jong ka NPP Farmers Front u Bah Himalaya M Shangpliang haba kren u la pynpaw ba tang na u soh Water Melon ka shnong Mynriang mynta kala paw nam bha bad ka long kaba donkam ban pynlong ïa kum kane ka tamasa man la u snem khnang ba ki nongrep ki kiew irat ha ka ioh ka kot.
“Ym dei ban leit pynlong tamasa ha State Central Library, hynrei dei ban pynlong beit hapoh ka shnong Mynriang bad ai ba ki paidbah na kylleng ki jaka jong ka sor Shillong kin wan ban mad ïa u soh uba mih na kane ka shnong” ong u Bah Shangpliang.
U Bah Shangpliang u la ong ruh ba la shem snem un pyrshang ban pynkoh nguh ïa u Myntri Rangbah ka jylla u Conrad K Sangma ban wan hi ha kane ka shnong ban wan mad ïa u soh water melon.
Shuh shuh u la ong ba un sa kren bad u Myntri Rangbah halor ka dorkhar ba la ai da ka shnong halor ka jingdonkam, kum ka jingpyniaid iew ia une u soh, ka jaka ban buh ne ka cold storage khnang ba u soh un ym snem bad kiwei kiwei de ki jingdonkam.