Shah kynthup ka M’laya ha ka Group C na ka bynta ka Dr Talimeren Ao Junior Girls’ NFC 2026-27
NEW DELHI, Nailar 16: Ka samoi 2026-27 jong ka Dr Talimeren Ao Junior Girls’ National Football Championship kan sdang naduh ka 10 tarik Nailur haduh ka 07 tarik Risaw 2026 na ka bynta ka Tier 1 bad 2.
Ka Anantapur, Andhra Pradesh kan pynlong ïa ka Tier 1 ha ka sien kaba lai lynter naduh ka 10 tarik haduh 25 tarik Nailur, katba ka Tier 2 kan long ha RK Ashram Ground ha Narainpur, Chhattisgarh, naduh ka 15 tarik Nailur haduh ka 07 tarik Risaw.
Ka Tier 1 kan don 15 tylli ki kynhun ba la phiah ha ki lai tylli ki Group kiba don saw kynhun bad kawei ka Group kaba don lai kynhun. Ka Tier 2 ka don 18 tylli ki kynhun ba la phiah ha ki ar tylli ki Group ba don san kynhun bad ar tylli ki Group ba don saw kynhun.
Ki kynhun kiba pyndep ha khlieh duh ha la ki jong ki Group kin rung sha ka semi phainal. Ka Uttar Pradesh bad ka Maharashtra kidei kiba la kiew kyrdan na ka Tier 2 ha kaba kut jong ka samoi ïalehkai ba la dep, kin ïakhun ha ka Tier 1 ha u snem 2026-27, da kaba bujli ïa ka Goa bad Arunachal Pradesh, kiba la shah pynhiar kyrdan bad kin ïakhun ha ka Tier 2 mynta ka samoi.
Ka Manipur kadei ka kynhun kaba bat ïa ka nam lahduh, hadien ba ka la pynliem ïa ka West Bengal da 9-0 ha ka phainal jong u snem ba la dep ha Anantapur.
Na ka liang jong ka jylla Meghalaya, kan ïakhun pyrshah ïa ka Jammu & Kashmir, ka Punjab bad ka Nagaland ha ka Tier 2 hadien ba baroh saw tylli ki kynhun ki la shah kynthup lang ha ka Group C.
Ka Meghalaya kan aireng nyngkong pyrshah ïa ka J&K (18 tarik Nailur), nangta ïa ka Punjab (20 tarik Nailur) bad khatduh ïa ka Nagaland (22 tarik Nailur) na ka bynta ka Group stage jong ka Tier 2.
Ki kynhun ban ïakhun ha ka Group Stage jong ka Tier 1:
Group A: Manipur, Chhattisgarh, Uttar Pradesh, Kerala
Group B: West Bengal, Maharashtra, Odisha, Rajasthan
Group C: Delhi, Gujarat, Bihar, Jharkhand
Group D: Tamil Nadu, Andhra Pradesh, Karnataka
Ki kynhun ban ïakhun ha ka Group Stage jong ka Tier 2
Group A: Chandigarh, Sikkim, Uttarakhand, Tripura, Sports Authority of India
Group B: Telangana, Goa, Andaman & Nicobar, Pondicherry, Arunachal Pradesh
Group C: Meghalaya, Jammu & Kashmir, Punjab, Nagaland
Group D: Mizoram, Madhya Pradesh, Assam, Himachal Pradesh