Shillong, Nailar 14: Ka BJP Mawlai Mandal ka la rakhe ïa ka pre Independence Day da ka khubor jong ka jingieit bad ka jingshakri ïa ka imlang sahlang, bad da kaba bud ïa ki dienjat jong u Myntri Rangbahduh jong ka ri uba la ai ha lade ïa ka kyrteng “Pradhan Sevak”, kaba mut u nongshakri ba hakhmat eh.
Ki dkhot jong ka BJP Mawlai Mandal ki la leit jngoh ïa ka Pasteur Hospital bad ki la ai snam kum ka dak jong ka jingshakri ïa ka ri.
Ka kynhun, kaba la lam khmat da u President jong ka Mandal, u Synshar Maiong, bad u General Secretary, u Tenny Manih, ki la ïakynduh ruh ïa ki nongshong shnong kiba donkam ïa ka pynphai kylla ïa ka snam, khnang ba ki bahaïing hasem jong ki kin lah ban mih noh na hospital, hynrei kim tip bha ïa ka rukom ban pynbeit ïa kane.
Lyngba kane ka jingshakri jong ka jingai snam, ki nongtrei BJP Mawlai Mandal ki la wanrah ïa ka jingkyrmen thymmai bad ki jingrisa ha ki khmat jong ki nongshong shnong kiba la shah ktah ha kane ka jingeh.
Ka jingshakri jong ka BJP Mawlai Mandal ïa ka imlang sahlang ka long ka nuksa bad ka jingpynshlur ïa baroh ki nongtrei jong ka party ha Meghalaya.
