Shillong, Nailar 14: Ka Meghalaya AIDS Control Society (MACS) ka la pynmih ïa ka jingpynbna bad pyntikna ïa ka jingtip halor ka Intensified IEC Campaign 3.0, kaba bud da ka jingwanrah ïa kane ha ka prokram kaba la pynlong ha Lady Keane College, Shillong.
Na ka liang ka MACS ka la dep pynbna ba la don haduh 558 ngut kiba ïoh ïa u khniang jingpang Niangkulia lane HIV-positive napdeng ki paidbah hapdeng u bnai Ïaïong haduh Naitung 2026, katba ïa ki longkmie ba armet ki don haduh 60 ngut kiba la ïoh ïa une u khniang jingpang Niangkulia ha ujuh u bnai.
Ka MACS ha kajuh ka por ka la kyrpad ban pyntip ba katno ngut ki don kiba la ïoh ïa une u khniang jingpang bad ban pyni ha ka kaiphod.
Ka la ïathuh ba la don haduh 9,244 ngut ki paidbah kiba im bad une u khniang jingpang HIV (PLHIV) ha ka jylla Meghalaya, katkum ka jingbatai na ka HIV Estimation Report 2025 bad la don ki jingïalang ha ki 1,026 tylli shnong.
Katba 3,000 tylli ki skul la dep pynlong ïa kane ka prokram jingïalap pynsngewthuh bad 85 tylli ha ki kolej, la don ruh ka jingshad tynrai haduh 30 tylli bad 30 tylli kiba ïashim bynta da ki paidbah.
Ïa ka bynta jong ka jingleit pynhusiar ha man ki thliew ïing briew, la pyndep haduh 15,000 tylli ki ïing bad 12 tylli ki camp bad kyrpang la dep buh ha ki jaka sumar jong ka sorkar.
Katba ha kylleng ka jylla Meghalaya, la don haduh 10 tylli ki prokram pynhusiar pynsngewthuh bad ka MACS ka la kyrpad ba ki paidbah kin tip ïa kine ki jingpynbna khnang ban pynthikna ba ka jingpynphriang ïa ki khubor shaphang ka HIV bad AIDS ka long kaba neh, kaba biang bad kaba kit khia bad ba ki paidbah kin tip shaphang kane khnang ban long kiba husiar ïa la ka jong ka jingim.
