Sa ha Jowai bad Mairang ban shna ka NEDI ïa ki Cold Storage ban myntoi ki nongrep ka jylla

Shillong, Nailar 14: Kan long ka khubor kaba bha ba ka North East Development Initiative (NEDI) kan nang pynïar shuh shuh ïa ka jingshna ïa ki Cold Storage, ha kaba kan sa shna kawei ha Jowai bad kawei ha Mairang da ka jingthmu ban buh ban pynneh kham bun sngi ïa ki mar rep jong ki nongrep ha ki jaka bapher bapher.
La ong ba kawei kaba la dep shna ka Cold Storage ha Mawblei kaba buh ïa ki dohkha im ïa kaba la plie da u Myntri ka tnad rep u Timothy D. Shira bad na kane ka jaka yn sa sam pat sha ki nongdie khutia bad kane ka long shi bynta ban kyntiew ïa ka thaiñ shatei lammihngi.
Ha kajuh ka por ka NEDI ka ïatreilang bad ka Don Bosco Technical School Shillong ban hikai kumno ban shna ïa ki Cold Storage ban peit bad ban sumar ïa ki bad kane ka long shibynta ba ki samla kin ïoh ïa ka jinghikai kaba bniah khnang ba ki lah ban pynïaid ïa kine ki Cold Storage.
Ha kajuh ka por ka NEDI kan sa shna ïa ka jaka buh dohkha kaba la tip kum ka Indigeneous Ornamental Fish Underwater Aquarium bad kane kan don ha nongbah Shillong, ka NEDI ka la pynmih ruh ïa ka kot kaba la ai kyrteng North East Connect, kaba la shon ïa ka da ka ABK Media India Limited da kane la pynïar ïa ka jingtreikam na Meghalaya sha Tripura bad ka phang pdeng ka long ka India kan khlaiñ ha baroh ki dong bad ki thaiñ kin kiew ha baroh ki liang.