Ka Tiranga Yatra ryngkat ka lama ba 150 phut ïaid rally ka BJP ha Nongpoh, shuwa ka sngi laitluid

Nongpoh, Nailar 14: Shuwa ka jingrakhe ïa ka sngi laitluid jong ka ri India bad shi bynta ban hikai ïa ki paidbah ban burom ïa ka lama ka ri India bad kumjuh ruh ban pynrung ïa ka mynsiem ïeid ri, ka BJP Ri-Bhoi District mynta ka sngi ka la pynlong ïa ka Tiranga Yatra ne ka jingïaid rally ryngkat ka lama ka ri India kaba jrong kumba 150 phut ba la sdang naduh downgate Nongpoh haduh madan NSCA Pahamsyiem kaba dei ka jaka ban rakhe ïa ka Independence Day lashai ka sngi.
Ha kane ka jingïaid rally la wan ban shim bynta da ki nongïalam ka BJP haka jylla naduh u Rikman G. Momin State President, Wankitbok Pohshna General Secretary, Kong Daniella Nonglait- State Secretary In charge Ri-Bhoi, Sen Thabah President ka BJP Ri-Bhoi, lem bad kiwei kiwei ki nongïalam, ryngkat ki khynnah skul, ki khun samla ka thaiñ hapdeng ka jingshit kyr-ang jong ka sngi.
Haba kren ha kane ka sngi na ka liang u Bah Wankitbok Pohshna u la ong ba kane ka dei ka sienjam bala shim da ka BJP ban pynshlur ïa ka mynsiem ieid ri ha ki paidbah nongshong shnong khamtam ban burom ïa ka mei India, ïa ka lama kumjuh de ïaka jingrwai Anthem kumba ka ri India ka la kynjoh 80 snem ka jinglaitluid naka jingsynshar ki dohlieh bad ngi sngewkmen ban don ha kane ka mei India kaba ngi im laitluid.
Shuh shuh u la ai ruh ka jingkhublei ïa baroh kiba la don bynta ban ïakhun ïaka jinglaitluid ka ri khamtam kiba haduh mynta ki dang ïada ïa ngi na ki nongshun bad kyrmen skhem kumba u Myntri Rangbah duh ka ri u angnud ba ka ri India kan kiew shaphriang hadien 20 snem ngi kyrmen ba kan long kumta, u la bynrap.