Jowai, Nailar 14: Ki Nongtrei jong ka koit ka khiah naka Ladthadlaboh Urban PHC (Health Welness Centre) hapoh ka jingïalam jong u Dr. D.Nongpluh, ki la pynlong ïa ka Special Outreach Camp jong ki ïa ki Nongshong shnong jong ka Mookyrdup Jowai hynne ka sngi 14.8.2026, ha ïingdorbar Hall jong ka Mookyrdup bad kumba sawphewngut eiei ki nongshong shnong ha ki jingpang bapher bapher ki la ïoh jingsumar na u Dr. D. Nongpluh bad ka kynhun jong u, kiba kynthup ïa ka kong Suteki Siangbood, kong Kyrmen, kong Jane, kong Rebecca bad ka kong Hilda Gympad.
Kumba ka Sorkar ka angnud ban rat diengkhong ïa ka jingpang Tuberculosis (T.B) kane ka kynhun ka la rah ruh ïa ki kor ki bor X-ray na ka bynta ban jurip bniah (Checkup) ïa ka jingpang TB. Ki Rangbah bad ki Longkmie wat lada kim sngew halade ba don kane ka jingpang TB ha ka met ka phat jong ki, pynban ki wan shah X-ray ban pynthikna ïalade ban tip la ki don ne kim don kane ka jingpang T.B, bad ïa ka result yn sa pynïoh kham hadien.
Na ka liang ki Nongshong shnong lyngba kane ka kynhun Nongtrei ka Urban Health Wellness Centre Ladthadlaboh Jowai, ki la pynpaw ka jingsngewnguh ïa ka Sorkar Jylla bad ïa ki nongtrei jong kane ka Urban Health Wellness Centre kiba la kloi ban wan sha ka shnong jong ki bad ai ka jingsumar ei ïa baroh kito kiba wan phah check ïalade.
Ha ka juh ka por ki pynpaw ka jingsngewnguh kaba kyrpang ïa u Dr. D. Nongpluh uba la check bad Examin bha ïa uwei pa kawei ki Nongphah check ha kane ka sngi bad kum juh ïa ka kynhun jong u (Nurses and Helpers) kiba pyni da ki kam ban kyrshan ïa ki tymmen ki kro da kaba shan ba sdhuh ha ka lynti ïaid jong ki la sha u Doktor ne shim dawai.
Ha ka jingshisha ha kaba kum kane ka “Special Outreach Camp” bun ki Samla pule, ki khynnah skul kiba kwah ban wan phah check ïalade, pynban kim ïohlad naba ka dei ka sngi long klas, long skul ki khynnah bad na ka liang ki nongshong shnong, u ma M. M. Thaiang uba long u Symbud Waheh Chnong ula ai jingmut ba haba ka tnat ba dei peit ïa ka koit ka khiah ki wan pynlong ïa kum kane ka Special Outreach Camp ki la dei ban pynlong ha ka sngi Saitjaiñ ban ïohlad ki khun samla pule bad ki khynnah skul jong ka shnong ban wan phah check ïalade.
Ha kane ka sngi la don ruh ka jingai Syrnot ïa ki katto katne ngut ki longkmie jong ka shnong da ka Urban Health Wellness Centre Ladthadlaboh, Jowai.
