Ai por ka JNC 10 sngi ïa ka sorkar ban bishar ïa ka Jingpynsngew Paidbah, lymkumta yn pynlong da ki jingiakhih

Khliehriat Nailar 13: Ka Jaiñtia National Council (JNC) Central Executive Committee, ba la lam khmat da u General Secretary, u bah Wanshwa Suting, mynta ka sngi lyngba ka dorkhas ba la buh hakhmat u myntri rangbah ka jylla ka la pynpaw ka jingsngew khia halor ka jingthmu ka company Shree Cement ban ahna ïa ka Limestone mining project ha u Lum Syrman, East Jaiñtia Hills District, ha ka jaka kaba heh haduh 217.394 hectares,ka seng ka dawa bad ong ba dei ban ïada bad pynneh pynsah shwa ïa ka jaka ba yn ailad ïa kano kano ka sienjam kaba ym lah ban pynkylla pat hadien na ka bynta katei ka projek.
Ka seng ka la ai por ïa ka Sorkar Jylla “10 sngi, kata naduh ba la pdiang ïa ka Memorandum ba ka sorkar ka dei ban leh ïa kaba donkam bad ban sdang ïa ki kam synshar kiba deihok, ban bishar bha ïa kane ka kam bad ong ruh ba lada ym don kano kano ne ka jingbishar kaba thikna hapoh kane ka por ba la buh, ka JNC ka maham ba kan shim da kiwei pat ki sienjam ban pynlong da ki jingiakhih kaba katkum ka aiñ bad kaba ïadei bad ka riti synshar paidbah, kynthup bad kiwei kiwei ki rukom iakhih paidbah, tad haduh ba ynda beit lut ki jingeh jong ki briew kiba shah ktah bad haduh ba kin ioh ïa ka jingbishar kaba hok.
“Ka JNC ka la pynskhem ba ki trai jaka kiba shah ktah ki la pynskhem ïa ka hok jong ki katkum ka aiñ bad ka riti dustur halor ki bynta jong ki ha Lum Syrman bad ki nongrep ki la pynpaw ïa ka jingsngewkhia ha kaba ïadei bad ka jingbym don ka jingmynjur kaba biang ne ki jingpynbeit kaba katkum ka aiñ kiba ïadei bad ka projek ba la tyrwa. Ka seng ka la dawa namarkata ïa ka jingpynshisha kaba la buh por bad kaba shai halor ka bynta u Lum Syrman, ka jingkynrum kynram ha u lum Syrman , ka riti dustur, ka jingrep bad kiwei kiwei ki kot ki sla ba thikna”
Ka seng ka pynpaw da ka jingsngew khia ba ki nongrep ki dei kiba la rep bad shaniah ha u Lum Syrman da ki phew snem, kiba im kamai da ka rep ka riang kumta yn ym lah ban shu bret noh ïa ki ha ka kyrteng jong ka jingpynmih marpoh khyndew ne ha ka kyrteng ka roi ka par, ka seng ka dawa ban iada ïa ka hok ki nongrep, ban pynioh bad ban pynneh ïa ka kam rep jong ki kaba la don lypa. Ha kaba uno uno u nongrep ne trai jaka uba shah ktah, u shah pynduh ia ka jaka ne ka jingim katkum ka aiñ, ka JNC ka pynskhem ba dei ban pynthikna ïa ka jingsiew ïa ka bai lutksan kaba hok kaba khuid bad kaba katkum ka aiñ na ka bynta ka jingduhnong kaba mih na kata ka jaka katkum ka jingpynbeit jong ki hok aiñ bad ki hok riti bapher bapher.
Haba kren halor katei ka phang, u General Secretary ka JNC u bah Wanshwa Suting u la ong “Ka long kumba ka Sorkar Jylla ka ai ka jingshah liang bad ailad ïa kine ki company dewbilat ba kan leh katba mon ïa ki kam jong ki, wat haduh u pud ban khanglad ïa ki nongshong shnong kiba mut ban leit sha ka jingpynsngew paidbah kaba la long ha ka 31 tarik u jylliew, ki trai jaka kiba shah ktah ki ia kynduh jingeh ha kaba pyndonkam ia ka hok jong ki ban iashim bynta ha ka jingpynsngew paidbah”
“Ka JNC ka la dawa shuh shuh ban bishar bniah bha bad bishar pura ïa ka jingbishar paidbah ne public hearing kaba pynlong ha ka 31 tarik u Jylliew 2026, kynthup ïa ki jingthoh jong ka jingwan bad jingiashim bynta, ki jingpyrshah, ki jingujor, ki jingbishar bad kiwei kiwei.Ka seng ka la buh ruh ka jingkylli hato ka jingbishar ka la iohi shisha ia kata ka jingiashim bynta paidbah kaba don jingmut bad kaba shai bad ka la wad shisha ïa ka jingmir jingmut bad ki paidbah lada la pynshisha ïa ki jingduna ha ka rukom treikam “ong u kyrwoh.
Ka JNC ka ong shuh shuh ba kane kam dei ka jingiakhun pyrshah ia ka roi ka par, Kane ka dei ka jingiakhun ban ioh ia ka hok, ka dei ruh ka jingiakhun kaba khuid ba suba na ka bynta ka khyndew ka shyiap jong ki paidbah nongrep kiba shah ktah kaba buh jingma ia ka kamai kajih jong ki, la bynrap u bah Wanshwa Suting.
“Ka JNC ka la pynpaw biang ba kan dang ïai bteng ban buddien ïa kane ka kam lyngba ki lynti kiba long katkum ka aiñ, ka synshar paidbah bad ka riti synshar ka ri bad kan ïeng ryngkat bad ki trai jaka bad ki paradoh para snam khamtam ki nongrep kiba rep ha u Lum Syrman kiba shah ktah bad ka seng kan ieng tat haduh ban da pynbeit pynbha ïa ki jingeh kiba dei hok jong ki nongrep bad trai jaka” pynpaw ka JNC.