Ïohmynsiem u Dr. Nonglait ba poi da ki spah ngut ki nongkyrshan haba pynlait ïa ka kot ‘The Pulse ‘ i kong Eldora

Shillong, Nailar 13: Ka 17 North Shillong Constituency jong ka seng National People’s Party ka la pynlong ka jingiakynduh lang jong ka Block Executive Committee bad u Dr. DRL Nonglait u kyrtong MP na Shillong Parliamentary Seat.
Ïa kane ka jingïakynduh lang la pynlong ha Khasi National Dorbar Hall Mawkhar.
Hapdeng ka jingpynpaw jong ki nongkyrshan kiba bun kiba la pynpaw ïa ka jingdonkam ban trei shitom ban pynjop ïa u kyrtong ka NPP, na ka liang u Dr. DRL Nonglait u la pynlait ruh ia ka kot ‘The Pulse echoes of the human spirit’ ba la thoh da ka Kong Eldora B Lyngdoh, Vice President State NPYF.
Haba kren lyngkot kum u kongsan u Kyrtong ka NPP ban ïakhun ïa ka elekshon shiteng samoi sha ka Lok Sabha na Shillong Parliamentary Seat u Dr. DRL Nonglait u la pynpaw ka jingsngew kmen ban donlang ha ka prokram bad kumjuh ïa ka jingtrei shitom i kong Eldora B Lyngdoh iba long ruh i artist ha kajuh ka por i nongthoh kot nongthoh Poitri ba don ka sap kyrpang.
U la ai khublei ïa baroh ki seng trei monsngewbha, ki riewniam, ki Rangbah Shnong, ki seng saiñ pyrthei bad kiwei kiba la wan ban sakhi ïa ka prokram ha kane ka lympung.
La pynïaid ïa ka prokram ba lyngkot da u President ka 17th North Shillong Constituency BEC u Bah Ransom Sutnga, ha ka jingdon lang u General Secretary u Bah G.E. M Kharpuri nalor ki nongkitkam, nongkyrshan da ki spah ngut bad kiba la shah khot sngewbha ha kaba ka prokram ka la long kaba jop bad shongkun.
Lah ban ong ba i kong Eldora B Lyngdoh i dei i nongshong shnong jong ka Shnong Mawkhar bad i la pyndep ruh ïa ka MSc Physics. I dei i Assistant Lecturer bad i nonghikai ba la shongthait noh na ka Skul Sacred Heart Boys HSS.
I dei i Artist bad nongthoh. I la ïoh ïa ka Kala Sadhu ‘Mid Career Artist Award 2025’ bad Artist of the Year Award 2025, ila wan baar ha ka Arona Poetry Award 2025, Italy ha ka Section: Unpublished Poitri in the World (In Sacred Union). I la ïoh ïa ka Grand Jury Award 2025 ha ka 2nd International Literary Competion ha Italy.
I la jop ïa ka Rotary Peace Art Festival Competion 2026, na Pune. I la pyndep ruh ïa ka Black Belt jong ka Karate, i la long Director Ka NRE Pageant India Pvt. Ltd, nangta Adviser ka Seng Kynthei Mawkhar WO, i dkhot ka ICSW bad AIPC bad Vice President ka State NPYF bad President ka 17th North Shillong NPWF NPP.