Mar synleit tied jingkhang sha ïingkashari, aiti u bah Alban ïa ka kamra sha u Paiem Ainam

Shillong, Nailar 13: U Bah Alban Fedrick Syiem uba la shah thung kum u Acting Syiem ka Hima Mylliem ha ka District Council, mynta ka sngi ha ka por 3 baje janmiet u la aiti biang ha u Paiem Ainam Manik Syiem u Syiem ba pura jong ka Hima Mylliem ban shimti noh ïa ka shuki bad ka kam u Syiem jong ka Hima. Kum ban shu kdew ba ïa u Bah Alban Fedrick Syiem la thung da ka Executive Committee jong ka KHADC ba la ïalam da ka VPP hadien ka jingshah sospon u Paiem Ainam Manik Syiem ha u bnai Jymmang 2026.
Hadien ba ka Meghalaya High Court ha ka 11 tarik u Nailar kala pynksan ïa u Paiem Ainam Manik Syiem mar mar u la wan ban shimti biang kum u Syiem ba pura jong ka Hima, hynrei u khlem ioh lad ban shong ha karma ba ju shong u Syiem namar ba u Bah Alban Fedrick u pyneh da kaba ong ba un shong beit kum u Acting Syiem katba ym pat ioh hukum na District Council.
Hynrei mynta ka sngi hadien ba u Paiem Ainam Manik Syiem u l a leit ban tied jingkhang biang sha ïing kashari bad dei ha ka por 3 baje eiei u Bah Alban bad ki Myntri kila mih noh na karma jong u Syiem bad aiti noh ha u Paiem Ainam Manik Syiem.”Mynta ka sngi nga leit biang sha High Court bad ngi la ujor pyrshah halor ka jingbym burom ïa ka rai jong ka ïing kashari namar ba kim aiti ïa ka ophis bad kham hadien u Bah Alban u la kynduh bad nga bad u la aiti da ka jingsngewthuh jingmut” ong u Paiem Ainam Manik Syiem.
Halor ka jingsangeh ban trei kam hapoh ka ophis jong ka Hima, u Paiem Ainam u la pyntip ba naduh mynta ka sngi hi baroh ki kam kin sdang biang kumba ju long man ka sngi.
Shuh shuh u Paiem Ainam u la pyntip ba lashai ka sngi ha ka por 12 baje un sa leit ban shimti noh ïa ka kamra trei kam jong u Syiem.