Shillong, Nailar 13: Ka lympung ïalehkai ‘Meghalaya State Archery Championship 2026’ ka la poi sha kaba kut hynne ka sngi Palei ha kaba ka South West Khasi Hills ka la pynkut ïa ka jingïakhun kum ka lahduh da kaba khur haduh 25 tylli ki takma.
Kane ka lympung kaba lai sngi lynter ba la pynlong da ka Archery Association of Meghalaya (AAM) ha SAI, NEHU, ka la khring ïa palat 200 ngut ki nongsiat khnam bad ki nongpynïaid (officials) na baroh 12 tylli ki Distrik kiba la wan ban ïashim bynta.
Ha ki jingïakop ka SWKH ka la bat ïa ka kyrdan ba nyngkong haduh kaba kut jong ka sngi ba ar hynnin ka sngi Balang hadien ka jingpyndep ïa ka Indian Round bad ki la lah ban bat skhem ïa ka kyrdan ba nyngkong wat hadien ka jingpyndep ïa ka compound bad recurve ruh kumjuh.
Hadien ba ka la khur sa 12 tylli ki takma hynne ka sngi Palei, ka SWKH ka la pynkut ïa ka jingïakhun jong ka da kaba jop 8 tylli ki takma ksiar, 10 tylli ki takma rupa bad 7 tylli ki takma rnong.
Ha kawei pat ka liang, ka East Khasi Hills ka la sakhi ïa ka jingkiew ha ka jingïalehkai jong ka ha ka sngi pynkut, kaba la kyntiew ïa kane ka District kaba pynlong ïa ki jingïalehkai na ka kyrdan kaba san sha ka kyrdan kaba ar ha ka lympung baroh kawei. Ka EKH ka la pynkut da 7 tylli ki takma ksiar, 7 tylli ki rupa bad 4 tylli ki rnong.
Ka West Khasi Hills ka la pyndep ha ka kyrdan ba lai da kaba khur 6 tylli ki takma ksiar, 6 tylli ki rupa bad 6 tylli ki rnong, katba ka Ri-Bhoi (4 tylli ki ksiar, 2 tylli ki rupa, 4 tylli ki rnong) ka la pyndep ha ka kyrdan ba saw. Ka East Jaintia Hills (takma-3 tylli ksiar, 3 tylli rupa, 3 tylli rnong) ka la kam ïa ka kyrdan ba san da kaba tam ïa ka East Garo Hills (3 tylli ksiar, 2 tylli rupa, 3 tylli rnong) da tang kawei ka takma rupa.
La wan kongsan ha ka sngi khatduh da u Myntri ka tnad ïalehkai jong ka Sorkar jylla Meghalaya, u bah Wailadmiki Shylla, uba la pynlut haduh lai kynta ban sakhi ïa ka kyrdan ïalehkai bad jingtbit ba la pyni da ki samla siat khnam jong ka jylla.
Haba ai jingkren ha ka jingïalang pynhap pyrda, u bah Wailad u la ong ba ka long kaba sngewtynnad ban ïohi ba ym shym la don kano kano ka distrik kaba synshar marwei hynrei ka jingïakhun ka long kaba ïakhaid bad kaba jur bha. “Ka jingkhublei ïa ka Archery Association of Meghalaya na ka bynta kata namar ka la trei shitom ban kyntiew ïa kane ka jingïalehkai ha baroh kawei ka jylla Meghalaya,” u la bynrap haba ai khublei ïa ka synjuk halor kane ka lympung kaba seisoh.
U bah Wailad u la ïaroh ruh ïa ka AAM namar ba ka long “kawei na ki synjuk kaba trei shitom bha ha ka jingpynkhreh ïa ki kynhun” na ka bynta ka 39th National Games 2027, kaba ka Meghalaya kan sa pynlong.
Kum u Myntri ka tnad ïalehkai u la ai ka burom ïa u Myntri Rangbah ka jylla, uba la buh hakhmat eh ïa ka jingkyntiew ïa ka kam ïalehkai ha ka jylla Meghalaya. Ha kine ki hynñiew snem ba la dep ka mang tyngka jong ka Sports and Youth Affairs ka la kiew na ka 70 klur tyngka sha ka 844 klur, la ong u bah Shylla. “Lyngba kane ngi don ka jinglah ban ai jingkyrshan kaba kham khraw ïa ki synjuk ïalehkai bad ki nongïalehkai jong ngi,” u la ïathuh, katba u pynkynmaw ruh ïa ki nongsiat khnam kiba don ha ka jingïalang, ba ka sorkar jylla ka la mynjur ïa ka polisi thung kam na ka bynta ki nongïalehkai kiba jop ban pynshlur shuh shuh ïa ki ban nang trei shitom ha ka jait jingïalehkai ba ki la jied.
Kane ka jingkyrshan ka la dep ban sei soh, la bynrap biang une u Myntri. Haba ïa dei bad ka 1st Khelo India Tribal Games kaba la long ha kaba sdang jong une u snem, u la ong ba ka Meghalaya ka la pyndep ha ka kyrdan kaba 13 bad ka jylla ka thmu ban rung sha ka thup kyrdan Top 5 ha u snem ban wan. Ki nongsiat khnam ka Meghalaya ki la khur ar tylli ki takma ksiar bad kawei ka takma rnong ha katei ka lympung – bad dei tang ka jingïakop siat khnam ka jingïalehkai ba ka jylla ka la jop takma ksiar.
Kiwei pat ki riew pawkhmat kiba la donlang ha kane ka sngi ki kynthup ïa u General Secretary ka Meghalaya State Olympic Association u Bah Finely L Pariat, Joint Secretary ka MSOA u bah P Laloo bad ki dkhot ba rangbah jong ka AAM.
