Mad ïa ki jingïakhih ba tyngeh lada ka sorkar kam jubab ïa ki mat dawa hapoh 15 sngi, byrngem ka KSU

Nongpoh, Nailar 12: Ki nongïalam ka KSU sengkmie bad kumjuh ruh ki nongïalam ka KSU North Khasi Hills District mynta ka sngi kila ïa lum khrui ha Umsning ban ai ka jingpynshai sha ki paidbah halor ki 5 tylli ki mat dawa jong ka seng, shuwa ban kut ka 15 sngi kumba ka KSU kala dep ban ai por ïaka sorkar.
Kitei ki 5 tylli ki mat dawa ka seng ki kynthup ba dei ban pyndam noh ïaka Public Hearing jong ka Shree Cement bad haka juh ka por ban sospon ïa u Deputy Commissioner, Superintendent of Police ka East Jaintia Hills bad ki ophisar ka MSPCB ban sdang noh ka jingtohkit pyrshah ïaki, kaba ar ka dei ban pynurlong noh ïaka Meghalaya Residents Safety & Security Act, 2016.
Ka jingdawa ba lai ka dei ban pynurlong noh ïaka jingpynkylla ïaka Meghalaya Identification, Registration (Safety & Security) of Migrant Workers Act, 2020, kaba saw ka dei ban pynbeit noh ïaki jingeh haka rukom thungkam jong ka NEIGRIHMS katkum ka jingkular bala ai bad kaba khatduh ka long ban thungkam da kaba shai bad kaba hok da kaba pynduh noh ïaka Personal Interview, wanrah jingkylla haka MPSC bad DSC, thaw ïaka SOP naka bynta kiwei pat ki bor thungkam.
Ha kane ka sngi la ai ruh ka jingkren kaba shai naki nongïalam ka KSU sengkmie naduh u Samla Pynkmenlang Sanmiet Vice President, u Samla Eric Nongkynrih Sports Secretary, ki nongïalam ka North Khasi Hills naduh u Bah Ferdinald Kharkamni President, u Samla James Mawphñiang General Secretary lem bad kiwei, kiba la ban jur ïaka jingleh donbor jong ka sorkar ïaka hok jong ki paidbah naduh ka thungkam thungkam kaba la pynduh mynsiem ïakiba bun ki khun samla namar kala rung haka jingmut jingpyrkhat ba tang kita kiba don jingïadei bad ki heh sorkar kiba ioh kam sorkar.
Ka jingdawa kaba hakhmat ka dei ban pyndam noh ïaka Public Hearing jong ka Shree Cement ha East Jaintia Hills namar ka seng kala kynnoh ba kadei ka Public Hearing kaba beaiñ, bad kum ki nongïalam seng kila pynpaw ruh ba ka sorkar watla ILP kam pat urlong kam shym la pyntreikam pura ïaka MRSSA, 2016 bad kaba kham pynbitar shuh shuh ka long ba ka sorkar ka ñiewbeiñ pynleiñ pynleiñ ïaka jaka ba seng kala dawa ban buh kum ka Entry point ne Facilitation Centre hynrei la thmu pynban ban dei ka jaka bam ne food court.
Halor kitei ki 5 tylli ki mat dawa jong ka seng kumba la ai por 15 sngi ïaka sorkar ban jubab lada kam lah, ka KSU kala byrngem da ki jingïakhih ba tyngeh haka jylla bad pan ruh ka jingkyrshan naki paidbah bad kumjuh ruh ki kmie ki kpa naka bynta kane ka dawbah ka seng ka buh hakhmat naka bynta ka bha ka miat bad ka jingkylla haka jylla baroh kawei.
Ha katei ka sngi la sakhi ruh da ka jingdonlang u Bah Rocky Kylla Chairman ka Umsning Town Durbar, ki nongïalam shnong naki shnong bapher bapher lem bad ki dkhot ka seng naki Circle bad ki unit bapher bapher ka them Ri-Bhoi.