Ka jingpynkylla ïa ka FCRA kam dei ban ktah ïa ka hok nongkynti ki seng ba shakri ka longbriew manbriew: VPP

Shillong, Nailar 11: Ka Voice of the People Party (VPP) ka la phah ïa ka jingthoh pynkynmaw sha u Myntri ka sorkar pdeng uba khmih ïa ka tnat ki Kam Pohïing u Amit Shah bad ïa kane ka shithi la phah lyngba u Lat ka jylla u C. H. Vijayashankar ha ka jingleit ïa kynduh jong ka seng ïa u Lat ha ka sngi baar ha Lok Bhavan.
Hadien ka jingleit ai jingthoh jingbuddien ïa ka jingthoh haba ïadei bad ka jingtyrwa ban pynkylla ïa ka Foreign Contribution (Regulation) Act (FCRA), 2026, u President ka VPP u Bah Ardent M Basaiawmoit u la ong ba ka party ka la phah ka jingthoh ban buddien ïa kaei kaba ki la pynsngew ha ka 4 tarik u Ïaïong 2026, kaba la phah sha u Myntri Rangbahduh ka ri ban pynpaw ka jingsngewkhia halor ka jingtyrwa ban pynkylla thymmai ïa ka Foreign Contribution (Regulation) Act (FCRA), 2026.
“Ha ka jingthoh jong kaba mynshwa, ngi la pynpaw ka jingsngewkhia halor katto katne ki kyndon, kyrpang kito kiba ïadei bad ki jingkurup ne pynïaid ïa ki jingdon jingem jong ki seng kiba lah ban shah pynduh noh ki laisen FCRA, bad ngi la kyntu ïa ka sorkar ba kan pynthikna ban ai ki lad jingïada ba biang ïa ki hok ki nongkynti, ki jinglaitluid ki jaka pule, ka hok kumba dei ban long bad ki rukom treikam kiba shai,” pynpaw u President ha ka jingthoh.
U la pynpaw ba kane ka jingaiti ïa ka jingthoh ka long ban buddien halor ki jinglong kongsan ka kam bad kaba ïadei kyrpang ruh ba kiba don ha Meghalaya bad ka thaiñ shatei lammihngi. U la ïathuh ba ki la don bun ki jaka pule bad ki seng niam ha ka thaiñ kiba la treikam da ki phew phew snem bad kiba la noh synniang bun bha ha ka kam pule puthi, ka koit ka khiah, ka bha ka miat, ka roi ka san ha ki nongkyndong bad ki kam shakri ha ka longbriew manbriew. U la ong ba bun na kine ki jaka pule, kynthup kito ba pynïaid da ki kynhun rit paid ki la ai ki jingshakri sha ki jaka ba kyndong kiba ki kam jong ka sorkar kim long barabor kiba lah ban poi.
“Ngi ithuh pura ïa ka jingkitkhlieh ka sorkar pdeng ban pynthikna ïa ka jingtreikam kaba khuid ba suba, ka jingkheiñ jingdiah kaba biang bad ka jingïada jingshngaiñ ïa ka ri halor ka jingwanrah kyndon ïa ki kam nohsynniang nabar ri. Ha kajuh ka por, ki bor ba la ïaid da ki kyndon dei ban lah ha kata ka rukom kaba dei, kaba shai bad kaba ïaid katkum ki nongrim ka hok tynrai bad ki jingïaid ki kam kiba dei. Ngi sngewkhia ïa ki kyndon kiba pynkupbor ïa ka jylla ban shimti ban pynïaid halor ki jingdon jingem ki jaka pule kaba pynbud sa ka jingpynduh noh ïa ka FCRA registration, lada la pynïaid khlem ki jingïada kiba biang ki lah ban ktah ïa ki jaka pule kiba la ai ki jingshakri pateng la pateng,” ong u President ka VPP.
U la ong ba ka VPP ka banjur ban pyrkhat biang ïa ki kyndon ba ïadei bad ka jingshimti ïa ki jingdon jingem jong ki seng kiba la shah pyndam noh ki jingregister jong ki, da kaba pynbiang ïa ki lad jingïada ïa ki hok ki nongkynti bad jinglaitluid ki jaka pule.
Ba dei ban pynbiang ki lad jingïada ïa ki kam leh isynei kiba dei hok, ki jaka pule, ki kam lehbha ha ka longbriew man briew bad ki seng wanrah kam pynroi khnang ba ki kam shakri ha ka imlang sahlang jong ki kan ym shah ktah shah pynthut na ki daw ki kam ba ïaid da ka aiñ.
Ka VPP ka kwah ban pynthikna ïa ka jingpyntreikam jong ka aiñ ba la pynkylla kam dei ban don ka jingthmu ban pyntlot ïa ki kam shakri jong ki ba la neh slem kiba kyntiew ruh ïa ki kam jingtei ïa ka ri bad ki kam pynroi imlang sahlang ha Meghalaya bad ka thaiñ shatei lammihngi.
“Kumta ngi kyrpad ïa u Lat ka jylla ba lyngba jong u, ba un phah ïa kane ka representation sha u Myntri ka tnat Kam Pohïing u Amit Shah, ba un pyrkhat bad ban shim ki jingtuklar bad ban buh hakhmat ka sorkar pdeng halor ki jingsngewkhia bad ki jingmih kiba la pynkhia jingmut na ka jylla Meghalaya. Ngi kyrmen ba ka sorkar pdeng kan shim ïa ka kam kaba long ïaryngkat kaba ïada ïa ka jingshngaiñ jong ka ri bad kumjuh ki kyndon kiba don ka jingïasoh da kaba ïada ïa ki jaka pule, ki hok nongkynti, ki jinglait luid ki jingtreikam ki jaka pule bad kumjuh ruh na ka bynta ka bha ka miat jong ki kynhun kiba don ha Meghalaya bad ka thaiñ shatei lammihngi,” ong u Bah
Ardent Miller Basaiawmoit, President ka Voice of the People Party (VPP) Shillong, Meghalaya.