Haduh 6, 51, 644 lak ngut ki nongthep vote ka jylla ki ban shah bishar bniah kum shibynta ka SIR

Shillong, Nailar 12: Ki bor pynïaid elekshon jong ka Jylla Meghalaya ki la ithuh ïa ki 6, 51, 644 lak ngut ki nongthep vote ban bishar bniah bha kum shi bynta jong ka Special Intensive Revision (SIR) kaba dang ïaid shakhmat ïa ki thup nongthep vote, ha kaba u Chief Electoral Officer u la bthah ïa ki ophisar jong ka district ban pynthikna ïa ka rukom treikam kaba biang shwa ban shim ïa kano kano ka rai.
Ka jingkheiñ ka kynthup ïa ki 2, 22, 786 ngut ki nongjied ba la kheiñ kum ki “Kim don Mapping” bad 4, 28, 858 ngut ki mukotduma kiba ïadei bad ka jingbym ïahap ha ka jingpynbeit map bad ki rekod SIR ba barim.
Ïa kane ka jingbishar bniah la pynlong da u Chief Electoral Officer ryngkat bad ki Deputy Commissioner/District Election Officer, ki Electoral Registration Officers bad kiwei kiwei ki ophisar elekshon ha ka sngi Ba-ar.
Ki jingbym iahap ba la pynpaw lyngba ka ECINET ki kynthup ïa ka jingbym ïahap ha ka kyrteng jong u nongjied ne ka kyrteng jong ki kmie ki kpa, ka jingïapher ka rta kaba pher hapdeng ki nongjied bad ki kmie ki kpa, ka jingïapher rta hapdeng ki shi para kiba ïadei bad ki kmie ki kpa, palat hynriew ngut ki khun kiba iadei bad ka kmie u kpa, bad ki katto katne ki jingbym ïahap ha ka rta kiba don jingiadei bad ki mei-ieit pa-ieit.
U CEO u la bthah ïa ki ERO bad ki AEROs ban bishar bniah ïa kine ki bynta bad ban pynthikna ba yn pynmih ïa ki jingpynbna bad ban pynlong ïa ki jingbishar ha ka rukom kaba ryntih.Ki nongjied kiba ïoh ïa ki jingpynbna kin ioh lad ban wan mih ha khmat ki ERO/AERO ba dei peit bad ban aiti ïa ki kot ki sla kiba kyrshan.
Ïa ka Draft Electoral Roll na ka bynta baroh 60 tylli ki Assembly constituency la pynmih ha ka 5 tarik u Nailar bad ka por ban thep ïa ki jingkam bad ki jingpyrshah kan dang plie haduh ka 4 tarik u Nailur, katba ka jingpynbna bad jingbishar kan dang bteng haduh ka 3 tarik u Risaw bad ïa ka thup kyrteng thep vote ba khatduh la buh ban pynmih ha ka 7 tarik u Risaw.
Naduh ba la pynmih ïa ka draft roll, ki bor pynïaid elekshon ki la ioh pdiang haduh 2,449 tylli ki aplikeshon – 1,121 tylli ha ka phorm 6, 8 tylli ha ka phorm 7, 253 tylli ha ka phorm 8 ban pynkynriah bad 1,067 tylli kiwei pat ki aplikeshon ha ka phorm 8.
U CEO u la pynlong ruh ïa ka jingïalang ba kyrpang bad ki nongmihkhmat jong ki seng saiñ pyrthei ba la ithuh ha ka ri bad ka jylla, da kaba kyntu ïa ki ban bteng ban trei lyngba ki Booth Level Agent jong ki ban ïarap ïa ki nongthep vote kiba dei hok ban pynshisha ïa ki kyrteng bad ki jingtip jong ki bad ban ujor ïa ki jingkam ne jingpyrshah ha kaba donkam.
Na ka liang jong ka tnad elekshon ka la pynpaw biang ba ym don kano kano ka kyrteng kaba paw ha ka Draft Electoral Roll yn nym pyndam noh khlem ka jingpynkhreh kaba biang.Ki ERO/AERO kiba donkti kidei ban pynmih ïa ka jingpynbna, pynlong ïa ka jingtohkit, ailad ïa u nongjied ïa ka lad kaba hok ban shah sngap bad pynmih ïa ka hukum kaba don nongrim shwa ban shim ïa kano kano ka rai.
Ki nongjied kiba sngewsih ïa ka rai jong ki ERO ki lah ban ujor sha u District Magistrate hapoh 15 sngi.Lah ban ujor biang hakhmat u Chief Electoral Officer hapoh 30 sngi hadien ba la hukum u Majistor District.
U CEO u la kyntu ïa ki nongthep vote kiba dei hok ban peit bniah ïa ki kyrteng bad ki jingtip ba kyrpang jong ki ha ka draft roll bad ban pyrshah hapoh ka por ba la buh ban ïa kaba ap haduh ka por ba la buh.