La jied san tylli ki shnong ha EJHD na ka bynta ka pilot project jong ka Solid Waste Management

Khliehriat, Naitung 24 : Na ka bynta ban pyntreikam ïa ka pilot project jong ka Solid Waste Management, jong ka tnat Swachh Baharat Mission East Jaiñtia Hills District, ka ophis jong u Deputy Commissioner East Jaiñtia Hills District ka la jied san tylli ki shnong ba kynthup ka shnong Moolamylliang, ka Latryke, Ladrymbai, Tuber bad kawei ka shnong yn jied napoh elaka Narpuh, kane ka project kan ïarap shikatdei eh ym tang tang ban kyntiew ïa ka khuid ka suba, hynrei ban wanrah ïa ka koit ka khiah, ka lad aikam ai jam bad kumjuh ruh ban kamai pisa.
Katkum ka jingïathuh u District Coordinator Swachh Bharat Mission, East Jaiñtia Hills District, u bah Wanbha Buam, la ong ba ïa kane ka project ka SBM ka angnud ban leh kham bniah shuh shuh ban kyntiew ïa ka khuid ka suba “Ngi la pyndep ïa ka jingleit jurip sha ki shnong ki thaw, ka jingthmu ba kongsan jong kane ka project ka long ban pynduh noh ïa ka jinglum thup ïa ki niut (landfill), ban pynlong ïa ki shnong kiba khuid ba suba na ka bynta ka koit ka khiah, kumjuh ruh ban pynlong ïa kane kum ka lad kamai bad ka lad aikam ai jam”
La ong ba ha kane ka project, ki kali kit ñiut ruh kin hap ban kit ar sien ha ki ar bynta, kata shisien kin kit ïa ki ñiut kiba pyut bad shisien pat kin kit ïa kito ki ñiut ki bym pyut, ka tnat ka la don ka jingthmu ban iakren sani bha bad kito ki briew kiba ju thied bad lum ïa ki tiar jot (ki tiar ki bym pyut), yn buh ruh ïa ki nongtrei ki ban jied ïa kito ki ñiut kiba pyut bad ki bym pyut, kane kan long ruh kum ka lad aikam ïa ki ruh, ïa kito ki ñiut kiba pyut ki nongtrei kin pyniakhlad (segregate) ban pynkylla sboh ïa ki ñiut kiba pyut bad ïa ki sboh ki lah ban die, ïa kane ka rukom ban pynkylla sboh ruh ka tnat SBM kan ai jinghikai ïa ki, katba ïa kito ki ñiut ki bym pyut pat ki lah ban die noh ha kito ki jaka ba lum ïa ki tiar jot bad lada don ki tiar ki ba ki nonglum thup ïa ki tiar jot kim lah ban thied, kum ïa kine pat ka tnat kan phah kit noh sha ki karkhana dewbilat ban thang ïa ki ha ki karkhana.
Dang myn ha ka sngi saitjaiñ, ka tnat Swachh Bharat Mission East Jaiñtia Hills District, ka la pynlong ïa ka prokram ai jingpynshai ha shnong Moolamylliang ban pynshai ïa ki paidbah, ban pynsgewthuh halor kumno ban pyniakhlad ïa ki ñiut ha ki ar bynta, kata ban lum la ka jong ïa kito ki ñiut kiba pyut bad ki ñiut ki bym pyut, la pynshai shuh shuh ruh halor kumno ban thaw ki lad kamai da kaba pyniakhlad ïa ki ñiut (segregate), ym tang katta kane ka project ka don ka daw bah ruh ban wanrah lane ban kyntiew shuh shuh ïa ka khuid ka suba ha ki shnong ki thaw bad la ong ba kane ka project kan long kaba jop tang lada ki paidbah nongshong shnong kin ai ka jingiatreilang bad ka tnat ban bud ïa ki jingbthah ban pyniakhlad ïa ki ñiut.
Ka tnat jong ka khuid ka suba, ka SBM kan sa nang ïai bteng shuh shuh ïa ki prokram ai jingpynshai sa sha kiwei kiwei ki shnong ruh bad la khmih lynti ba kane ka project kan long kaba jop bad lyngba kane ka Project yn lah ban wanrah ïa ka khuid ka suba kaba paka bha ha ki shnong ki thaw hapoh ka district