Jowai, Nailar 09: Ka kynhun Anti-Narcotics Task Force (ANTF), jong ka jylla hadien bala pynlong ïa ka jingkhynra kaba jur bha ha ki bynta ka Phramer ha ryngkat ka jingïatreilang bad ki pulit ka West Jaiñtia Hills ha ka 08 tarik u Nailar bad kila ïoh kem ïa ki ar ngut ki nongkhaïi drok kaba kurup haduh 48.78 grams ka jingkhia u drok bala shong dor haduh 7 lak tyngka.
Kitei ki ar ngut ki nongkhaïi Drug kiba dang thmu ban leit lynti na Silchar sha Shillong da kawei ka bus ba don ïa u registration Numbar ML-05-T-8381, mar mar ka kynhun ANTF jong ka Jylla bad ki pulit jong ka West Jaiñtia Hills kila pynlong ka jingkhynra kaba jur ha u surok NH-06 ha ki bynta ka Phramer bad ïoh bat syndon ïa katei ka bus ha ka por 8 baje mynstep.
Ki ar ngut kiba la ïoh kem la tip kyrteng kum u Robert Nongrum (33 snem ka rta) na Umktait, Nongmynsong, Shillong bad u Batskhemlang Jarain (32 snem ka rta) na Umktait Block-III, Shillong.
Ha ka jingtalasi na kitei ki ar ngut kila lap na ki ar tylli ki khop sabon ba la buhrieh hapoh ka jaket ba la pyntkna ba u dei u drug bad ki pulit ki dang pynlong ka jingtohkit kaba bniah ban lap ïa kiwei de kiba donkti.
Halor kane ka jingïoh kem drug ka kynhun Anti-Narcotics Task Force, Meghalaya, ka dang ïai bteng ban pynjur shuh shuh ïa ki jingkhynra pyrshah ïa ki kynhun khaïi drog hapoh ka jylla.
La kyntu ruh ïa ki paidbah ba kin don ka jingïatreilang bad ki pulit da kaba pyntip mar mar lada suba ba don ki briew kiba khaïi drok. Ïa kiba ai jingtip tikna kin ïoh ïa ka khusnam kum ka jingdon bynta lang jong ki ban pynlait ïa ka jylla na u drug.
