Sha shilliang ka wah Umtrew jam ki nongïalam, ban pynskhem ïa ka unit bathymmai

Nongpoh, Nailar 09 : Ka Khasi Students’ Union (KSU) sengkmie ryngkat bad ka KSU North Khasi Hills District, ha ka 7 tarik Nailar ki la leit sha shilliang ka Wah Umtrew, ha Lailad, ban pynskhem ïa ki nongkitkam bad dkhot jong ka KSU Lailad Unit kaba dang shu seng thymmai.
Kane ka jingïalang ka long kum shi bynta ban pdiang bad pyntian smai ïa ki dkhot kiba la pynpaw ïa ka jingangnud ban shakri ïa ka shnong, ka imlang sahlang bad ka jaitbynriew lyngba ka rynsan jong ka KSU.
Ka KSU Lailad Unit, kaba hap hapoh ka Paham-Mawleiñ Circle, ka dei ka unit kaba dang shu seng thymmai, ha kaba haduh 20 ngut ki samla bad rangbah na ka shnong Lailad ki la wan shakhmat ban pynïasoh bad ka seng, da ka jingthmu ban trei lang bad ban noh synñiang sha ka jingroi bad jingbha jong ka shnong.
Ha kane ka sngi, la pynbna ruh ïa ki nongkitkam jong ka unit ba thymmai, ha kaba Samla Kenedy Buam u la shah jied kum u President, Samla Koper Bamon kum u Vice President, Lamphrang Tynsing kum u General Secretary, Benjamin Nongkrut kum u Assistant Secretary, Story Khongstia kum u Education Secretary bad Solomon Khriem kum u Organising Secretary, ryngkat bad kiwei pat ki dkhot.
Ïa kitei ki nongïalam ba thymmai ka KSU Lailad Unit la pynskhem da u Samla Pynkmenlang Sanmit, Vice President ka KSU sengkmie. La ïadonlang ruh u Eric Nongkynrieh, Sports Secretary ka Central Executive Council, Bah Ferdynald Kharkami, President ka KSU North Khasi Hills District, James H. Mawphniang, Secretary, Banjop Maring, Assistant Secretary, bad kiwei pat ki nongïalam jong ka seng.
Haba kren ha ka jingïalang, ki nongïalam ka sengkmie bad kumjuh ruh naka District ki la pynpaw ba ka KSU ka dei ka rynsan kaba hikai bad tei ïa ki samla ban long ki nongïalam kiba don ka mynsiem ban shakri ïa ka ri, ka jaitbynriew bad ka imlang sahlang.
Ki la kyntu ïa ki dkhot ba thymmai ba kin trei hok bad shitrhem, da kaba don ka mynsiem jingïatreilang, jingïasngewthuh jingmut bad jingïatylli, khnang ban lah ban pyndep hok ïa ka kamram kaba la bynshet ha ki.
Ki nongïalam ki la ban jur ruh ba ka KSU Lailad Unit ka dei ban ïatreilang bad ka Dorbar Shnong bad ban burom ïa ka iktiar jong ki bor shnong, khlem da ïaid lait ïa ki kyndon bad rukom treikam jong ka shnong.
Nalor kata, ki la kyntu jur ïa ki dkhot ba kin long kiba hakhmat ha ka jingïakhun pyrshah ïa ki kam sniew ha ka shnong, khamtam ban ïada ïa ki samla na ka jingma jong u drok bad kiwei pat ki jingeh kiba lah ban ktah bad pynjulor ïa ka imlang sahlang bad ka lawei jong ki khun samla.