Nongpoh, Nailar 09 Ki paidbah ka shnong Nongpoh ki la lap ïa ka met jong uwei u rangbah ba la thiah ïap ha ka baranda jong kawei ka dukan kaba don harud ka surok bah, ha Nongpoh Upgate.
Katkum ka jingïathuh ki paidbah la lap ïa utei u rangbah ha ka por kumba 7:30 eiei haka janmiet jong ka 7 tarik Nailar, bad la pyntip mar-mar sha ki nongïalam shnong bad sha ki bor pulit. Hadien ka jingpoi ki pulit sha katei ka jaka, ki la rah noh ïa ka met jong utei u rangbah sha Civil Hospital Nongpoh ban leh ïa ki jingdonkam katkum ka aiñ.
Haba kren halor kane ka jingjia, u Secretary Shnong, Samla Anthony Suchiang, u la pynpaw ïa ka jingsngewkhia, khamtam namar ba ym pat lah ban ithuh ïa ka kyrteng bad ka dur jong utei u rangbah.
U la ong ba kane kam dei ka sien kaba nyngkong ba ki nongshong shnong ki lap ïa ki met jong ki briew kiba nabar shnong kiba wan thiah ïap ha katei ka jaka, hynrei ka la ju jia bunsien.
Katkum ka jingïathuh jong u, haduh mynta ym pat lah ban pynthikna ïa ka daw kaba wanrah ïa ka jingïap jong utei u rangbah. Hynrei, la don ka jingsuba ba ka lah ban dei ka jingdih kyiad. Ka daw kaba shisha kan sa paw hadien ka jingtohkit bad ka jingpynshisha jong ki bor ba dei khmih.
U Secretary Shnong u la ïathuh ruh ba ka shnong ka la ju pyrshang ban tehlakam ïa ka jingïawan jong ki briew kiba nabar ban shong bad dih kyiad ha katei ka jaka. Hynrei, namar ka jingdum bad ka jingbym don ka jingshai kaba biang ha katei ka jaka, ki briew kiba nabar ki dang ïoh lad ban shim kabu bad pynlong ïa katei ka jaka kum ka jaka dih kyiad.
Na ka liang ka shnong ka la maham tyngeh ba lada dang bteng ka jingpyndonkam bakla ïa katei ka jaka kum ka jaka bam bad dih kyiad, ka shnong kan hap ban aiti noh ïa ka kam sha ki bor jong ka aiñ ban leh ïa kaba donkam katkum ki kyndon jong ka aiñ.
