Pashat jingmut u Dr. Nonglait ban buh ïa ka FCRA Cell ha Meghalaya ban suk rejister ki Seng Niam

Shillong Nailar 8: U Kyrtong ka NPP sha ka elekshon MP shiteng samoi ka Shillong Lok Sabha u Dr DRL Nonglait ha ka sngi Palei, ula pashat jingmut ba dei ban buh ïa ka shnat treikam (Branch/ Cell) ka FCRA ha Meghalaya ban pynsuk ïa ki kynhun niam ba kin regjister.
Haba kren ha ka rynsan ïalap elekshon ha Rymbai, East Jaintia Hills district, u Dr Nonglait ula ong, ba ka la don ka jingkulmar jingmut jong kiba bun ha kaba ïadei bad ka Foreign Contribution Regulation Act, ha kaba bun ki Balang bad ki kynhun niam ki la pynpaw ïa ka jingsngewkhia ha kaba ïadei bad ka jingwan poi jong ka pisa na ka bynta ki kam jong ka mission bad jong ki project.
“Kala don ka jingkulmar jingmut ha kaba ïadei bad ka mat jong ka FCRA. Bun ki ïingmane bad ki kynhun niam ki bapher bapher ki la dap da ka jingsngew khuslai halor kane” ong u Dr Nonglait.
Ula ong, ba ki nongïalam ka jylla kila shimkhia bha halor kane ka mat. “Nga lah dep ïakren bad u Myntri Rangbah ka Jylla ryngkat bad ki arngut ki Symbud Myntri Rangbah ka Jylla bad ha kaba ïadei bad ka jingsngewkhia ban shah ktah jur ki kynhun niam kiba pyntreikam ïa ki Mission kiba la kyrshan da ki ri kiba nabar” ula ong.
Da kaba sot ia ka jingkren u Myntri Rangbah, u Dr Nonglait ula ong, ba ka Sorkar Pdeng kam don ïa ka jingthmu ban khanglad ïa ka jingnoh synñiang jong ki ri kiba nabar hynrei ka dei thik tang ban pynbeit ryntih ïa ka rukom treikam.
“U Myntri Rangbah ula ong, ba ka Sorkar India kam don jingthmu satia ban pynsangeh ïa ka jingai jingïarap kaba wan na shabar ri, hynrei ka dei tang ban pyrkhing, kaba mut ban buh ryntih ïa ki kyndon treikam” ula ong.
Ban shimkhia ïa kane ka mat kaba la shem jingeh da ki kynhun bapher hapoh ka jylla, u Dr Nonglait ula tyrwa ba dei ban buh noh ïa ka shnat treikam.
“Ban pynsuk ïa kiei kiei baroh na ka bynta ki kynhun niam ki bapher bapher kiba donkam ïa ka jingïarap na shabar ka ri, ïa ka shnat treikam kum ka Branch ne Cell dei ban buh noh hapoh ka jylla Meghalaya khnang ba kino kino kiba donkam ban pynthymmai ïa ka FCRA Registration ki lah ban leh da kaba suk khlem kino kino ki jingeh” ula ong.
Ula pynpaw ba ki hospital, skul, ki jaka ri khunswet, ki Counseling Center kiba la pynïaid da ki kynhun niam ki donkam ïa ka jingïarap nabar ri bad ki mad ïa ka jingeh ha ka ban bud ryntih ïa ki kyndon jong ka FCRA kaba na shabar ka jylla.
U Dr Nonglait ula bynrap ba ka jingdon ïa ka Cell hapoh ka jylla kan ïarap ïa ki kynhun ba kin rejistar katkum ka por ba la buh bad ban kiar na kino kino ki jingslem ha kaban ïoh pdiang ïa kino kino ki jingïarap ha kaba ïadei bad ki projek kiba dang ïaid shakhmat.