Pynkup burom ka RKM ïa ki samla don sap ha ka Annual Cultural Competition ba 52 ha Nongbah Shillong

Shillong, Nailar 08: Ka Ramakrishna Mission Vivekananda Cultural Centre, Quinton Road, Shillong, mynta ka sngi, ka la pynlong ïa ka Jingsam Khusnam na ka bynta ka Annual Cultural Competition kaba 52, da kaba rakhe ïa ki jingjop jong ki samla kiba ïashim bynta bad ban kyntiew ïa ki jingngeit tynrai, ka jinglong ryntih bad ka jingkiew shaphrang ba pura.
Ka jingïakob kaba la neh khyndai sngi ka la sakhi ïa ka jingïashim bynta shitrhem, ha kaba 102 tylli ki jaka pule na ki 133 tylli ki jaka pule ba la khot ki la ïashim bynta. Baroh ki don 2,574 ngut ki samla pule kiba la pynrung kyrteng ha 35 tylli ki prokram, kiba la pyni ïa la ki sap ha ki prokram bapher bapher ba ïadei bad ka kolshor bad ka thoh ka tar. La sam haduh 253 tylli ki khusnam, kiba kynthup ïa 40 tylli ki khusnam ba wan nyngkong, 45 tylli ki khusnam ba wan baar, 43 tylli ki khusnam ba wan balai bad 125 tylli ki khusnam ba kyrpang ban ai ka jingpynshlur.
La sdang ïa ka jingïalang da ka jingbuh syntiew ha Meditation Hall, hadien kata la pynmeh ïa ka sharak hapdeng ka jingrwai Vedic da ki nongtrei mon sngewbha jong ka Vivekananda Youth Forum.
Ha ka jingkren pdiang burom, u Swami Hitakamananda u la ban jur ïa ka jinglong khuid, ka jingïaishah kum ki jinglong ba kongsan na ka bynta ka jingjop, da kaba shim na ki jinghikai jong u Swami Vivekananda bad ka Bhagavad Gita. U la ban jur ïa ka jingdonkam jong ka jingsngewrit bad u la ong ba ka jingïakhun kaba shisha kam dei ban long kaba wan na ka jingbishni ne ka jingkwah ban kynthoh ïa kiwei, hynrei da ka jingkut jingmut ban tam ïa la ki jong ki jingjop kiba mynshuwa.
Ki samla pule kiba la ïoh khusnam ki la ai ïa ki jingpule bad ki jingrwai ba la jied ha kane ka jingïalang. U Swami Buddha Devananda Maharaj, Symbud Kongsan, u la ai jingkren ha kane ka jingïalang ha ka ktien Khasi bad Phareng bad u la ban jur ba man la ka jingpyrshang kadei ban pynkhreh ïa ki briew na ka bynta ka lawei. U la batai ïa ka jingjop bad jingshah rem kum ki mawjam bad u la ban jur ba ka jingjop kaba shisha ka wan lyngba ka jingtreishitom kaba aiti lut, ka jingwad kaba ïaibteng ïa ka jingnang jingstad, ka jingkyntiew ïa ki nongrim bad ki jingduwai na ka bynta ka bha ka miat jong ki briew baroh. U la ong ba kine ki jinglong ki long ka bynta pdeng jong ka jingthmu jong u Swami Vivekananda na ka bynta ka longbriew manbriew.
U B.D.R. U Tiwari, Chief Electoral Officer, Meghalaya, kum u Kongsan u la ïaroh ïa ka Ramakrishna Mission kaba la lah ban pynlong ïa kane ka jingïakop ha ka rukom kaba heh kum kane. U la ong ba ka Mission kam dei tang ba ka kyntiew ïa ki jinghikai jong u Swami Vivekananda hynrei ka pynsaphriang ruh ïa ki nongrim ba ïadei bad ka jinglong briew man briew ki bym sahkut ha tang ki jingngeit kiba ïadei bad ka niam.
Haba kren shaphang ka jingdonkam jong ka hok, u Tiwari u la pynïasoh ïa ki jinghikai jong u Swami Vivekananda bad ka jingstad tynrai jong ki Khasi, da kaba kdew ïa ki nongrim jong ka ‘Tip Blei, Tip Briew’ bad ‘Kamai ïa ka hok’. U la ai ruh ka jingïaroh ïa ki nongjop khusnam, da kaba kdew kyrpang ïa ka jingrwai Sanskrit da ka Shazia Naaz. U la pynkut da kaba kyrpad ïa ka jingkyrkhu kyrdoh jong ‘U Blei Shillong’ bad u la kitbok kit rwiang ïa ka Ramakrishna Mission bad ïa baroh ki nongïashim bynta ba kin nangkiew shaphrang.
Ha ka jingkren ai khublei, u Swami Vedeshananda Maharaj u la pynpaw ka jingsngewnguh ïa ki jaka pule kiba la ïashim bynta, ki samla pule, ki kmie ki kpa, ki nongtrei monsngewbha bad ïa 53 ngut ki nongbishar kiba ka jingtreilang jong ki ka la ïarap ban pynlong ïa kane ka jingïakob kaba jop.
Ka Army Public School ka la ïoh ïa ka khusnam Best Institution, da kaba ïoh bun tam ki khusnam, katba ka skul Pine Mount ka la wan baar.
La pynkut ïa ka jingïalang da ka jingsam ïa ki khusnam bad ka jingshon dur lang ïa ki samla pule kiba la ïoh ïa ka jingjop ryngkat bad ki nongshah khot kyrpang, kaba long ka jingpynkut ïa kawei pat ka bynta kaba jop jong ka jingrakhe ba man la u snem jong ka Ramakrishna Mission ïa ka sap jong ki samla bad ka jingtbit ha kaba ïadei bad ka kolshor.