Ka Sorkar Pdeng ka dei ban pyllait ïa ki Balang bad ki Skul Niam na ka kyndon kurup jaka ka FCRA : Lahkmen

Shillong, Nailar 7 : u Myntri ka tnad Pule Puthi jongka sorkar jylla u ma Lahkmen Rymbui mynta ka Sngi Thohdieng u la kyntu jur ïa ka sorkar pdeng ban saiñdur bha ha ka jingwanrah jingpynkylla ha ka FCRA Amendment Bill 2026 namar kata ka bor jongka ban knieh ïa ki jaka puta ka lah ban ktah jur ïa ki Balang bad ki Skul Niam hapoh ka jylla Meghalaya.
U ma Lahkmen u la ong ba kat kum kane ka Bills ka ai bor ïa ki bor pynïaid ban kurup ïa ki jaka puta lada pynslem ban pynthymmai ïa ki kot ki sla ne lada slem ban pynthymmai ïa ka Certifiacate ruh.
“ Wei ba phi la rejister ha ka FCRA kan long junom bad lada phim bud ryntih ïa ki kyndon jongka ka don ka bor ban kurup ïaki jaka puta bad kane ka long kaba ma bha” ong u ma Lahkmen.
Ki jingdon jingem kim dei ban long tang haki Nongkitkam ne ka Trust hynrei wat ki jong shimet ruh.
U la ong ba ka long kaba eh haduh katta katta ïa ki skul bad ki Balang ban pynbiang ïaki kot ki sla ba da ki phew snem lynter. U la kyntu ba ïa ka pisa ba la ïoh lum shwa ban wanrah ka jingmynjur ïa kane ka jingpynkylla dei ban pyllait noh na ka FCRA bad kita ki aiñ ba thymmai ki dei ban long tang ïa ki fund ba dang thymmai. U la kyntu jur ïa kane na ka bynta ka bha ka miat ki Balang, ki Niam bad ki skul.
“ Ngi kwah ba ka sorkar ka dei ban tynsat ïa ka kyndon na ka ki Balang, ki skul, ki hostel, ki college, ki university lada don kino kino ki jingbakla dei ban shu daiñ kuna ym ban kurup ïa ki jaka puta” ong biang u ma Lahkmen.
U la maham ba lada ym don ka FCRA License, ïa kine ki tnad pule lah ban peit bad pynïaid da kita ki bor ba la pynkhamti.
Lada shah knieh license haduh 5-10 snem kata ka mut baroh ki skul, ki hospital , ki hostel kin hap hapoh ka jingpeit bad jingkhmih ki bor ba la pynkhamti.
U la ong hooid na ka liang u Myntri Rangbah ka jylla lem bad ki Nongïalam Niam ki la dep ïa kynduh ïa ki Myntri Sorkar Pdeng halor kane ka kam. “ Hooid ngi don bad ka sorkar ban pynduh pyndam ïa kita ki seng kiba pyndonkam ïa ka pisa bar ri hynrei ngi kwah ïa ki kyndon kiba biang ki ban ym ktah ïa ki Niam bad ki tnad pule khamtam ha kane ka jylla Meghalaya” pynkut u ma Lahkmen.